Энг бой россиялик тадбиркорларнинг бойлиги 2025 йилда қарийб 32,8 миллиард долларга ошди
Bloomberg Billionaires Index рейтингига кўра, Россиянинг энг бой тадбиркорлари 2025 йилда 32,75 миллиард доллар ишлаб топган.
Алишер Усмоновнинг бойлиги энг кўп - 6,04 миллиард долларга ошди. 2026 йил январь ҳолатига кўра, унинг бойлиги 19,3 миллиард долларни ташкил этади.
Усмоновдан кейинги ўринларни Урал кон-металлургия компанияси асосчиси Искандер Маҳмудов ва Telegram асосчиси Павел Дуров эгаллаган. Маҳмудов ўз бойлигини 4,75 млрд долларга ошириб, 7,88 млрд долларга етказди. Дуров 2025 йилда 3,38 миллиард доллар ишлаб топган, ҳозир унинг бойлиги 14,4 миллиард долларни ташкил этади.
Bloomberg миллиардерлар рейтингига жами 20 нафар россиялик киритилган. Рўйхатга, шунингдек, бизнесмен Сулаймон Керимов, Континентал хоккей лигаси директорлар кенгаши раиси Геннадий Тимченко, "Ренова" компаниялар гуруҳи директорлар кенгаши раиси Виктор Векселберг, "Северстал"нинг асосий эгаси Алексей Мордашов, "Онексим" гуруҳи эгаси Михаил Прохоров, "НОВАТЕК" компанияси ҳаммуассиси Леонид Михелсон ва Миллҳоусе инвестиция компанияси асосчиси Роман Абрамович киритилган.