NVIDIA GeForce RTX 3060 ни яна бозорга қайтармоқчи
Инсайдерларга таянган хабарларга кўра, NVIDIA оммабоп GeForce RTX 3060 видеокартасини яна сотувга қайтаришни режалаштирмоқда. Wccftech ёзишича, ишлаб чиқариш 2026 йилнинг биринчи чорагидайоқ қайта йўлга қўйилиши мумкин. Бу ҳақда playground.ru хабар беради.
Маълумотларга қараганда, бу қарор DRAM танқислиги ҳамда жорий авлод график процессорлари таъминотидаги чекловлар фонида кўриб чиқилмоқда. Яъни компания янги GPUлар етишмаётган пайтда бозорни арзонроқ ва синовдан ўтган ечим билан тўлдиришни исташи мумкин.
RTX 3060 илк бор 2021 йилда чиққан бўлса-да, ҳануз Steam'да геймерлар орасида энг кўп талаб қилинадиган моделлардан бири бўлиб турибди. RTX 4060 ва 5060 фаол тарғиб қилинаётганига қарамай, олдинги авлоднинг оммавий сегменти ўз аудиториясини йўқотмаяпти.
Қайд этилишича, NVIDIA ҳамкорларини ишлаб чиқаришни қайта бошлаш режаси ҳақида огоҳлантирган, бироқ қайси модификациялар қайтиши ҳозирча аниқ эмас: 8 ва 12 GB версиялари иккови ҳамми ёки фақат биттасими. Аввал 12 GB варианти илиқ кутиб олинган, 8 GB эса 128-bit шина сабаб танқидга учраганди.
RTX 3060 нинг эҳтимолий қайтиши DRAM муаммоси видеокарталар нархи ва етказиб берилишига қанчалик кучли таъсир қилаётганини ҳам кўрсатади. Хусусан, RTX 5060 учун GDDR7 хотираси ҳануз қиммат бўлиб қолаётгани оммавий сегмент имкониятларини чеклаётгани айтилмоқда.
Таҳлилчилар фикрича, агар NVIDIA бу релизни ҳақиқатан оммабоп қилмоқчи бўлса, нархни 200 доллардан пастроқ белгилаши маъқул. Шунда RTX 3060 ўрта тоифадаги геймерлар учун ҳамёнбоп муқобилга айланиб, компаниянинг mass-market сегментидаги позициясини мустаҳкамлаши мумкин.
Умуман олганда, RTX 3060 нинг қайтиши NVIDIAга оммавий сегмент таклифларини мувозанатлаш, янги GPUлар дефицитини қисман ёпиш ва ўйинчиларга вақт синовидан ўтган график процессорни яна бир бор таклиф этиш имконини беради.