1600 Вт қувватга эга "маҳлуқ": RTX 5090 Lightning хусусиятлари
MSI’нинг GeForce RTX 5090 Lightning видеокартаси ҳали расмий сотувга чиқмасидан туриб синовлардан ўтди: муҳандислик намуналари билан ишлаган оверклокерлардан бири Intel Core i9-14900KF процессори ёрдамида 3DMark Time Spy тестида 53 мингдан ортиқ балл тўплади. Бироқ бу натижалар пре-релиз босқичида қайд этилгани учун, серияли талқинларда кўрсаткичлар ўзгариши мумкин. Бу ҳақда playground.ru хабар беради.
Моделнинг энг асосий “қаҳрамонлик”ларидан бири — GPU ва хотирани бирдек бошқарадиган 40 фазали қувват тизими. Бундай схема кам учрайди ва элементларга тушадиган юкни камайтиргани сабаб юқори частоталарда барқарорликни оширади, бу эса экстремал оверклок учун муҳим. Расмий маълумотга кўра, карта 1600 Вт гача энергия истеъмолига мўлжалланган, XOC BIOS эса лимитни 2500 Втгача очиши мумкин.
Платада иккита 12V-2×6 коннектори бор: бу токни кабеллар бўйлаб тақсимлаб, битта улагичнинг ортиқча қизиб кетиш хавфини пасайтиради. Шу билан бирга, икки коннекторнинг ўзи ҳам картанинг жуда катта қувват талаб қилишидан дарак беради — MSI ҳозирча аниқ истеъмол кўрсаткичларини очиқламаган, тафсилотлар кейинроқ кутилмоқда.
Совутиш масаласида MSI янги авлод суюқлик совутиш тизимини таклиф қиляпти ва у нисбатан ихчам дизайнга урғу беради. Корпусга катта созланадиган LCD дисплей ўрнатилган — компания уни “тўлиқ сиртли” биринчи дисплей сифатида таърифлайди. Дизайн эса “Lightning” сериясига хос қора-сариқ рангларда бажарилган.
MSI таъкидлашича, янги суюқлик совутиш ечими тўлиқ интеграциялашган совуқ пластинага эга: у GPU, хотира ва юқори кучланиш занжирларини бир вақтнинг ўзида қамраб олади. Насос оқим динамикасини оптималлаштириб, иссиқликни зоналашган қовурғали, гибрид зичликдаги радиаторга йўналтиради — бу иссиқлик тарқалишини самаралироқ қилади.
Қўшимча равишда, график процессор жим ишлашга урғу берилган, аммо қудратли ўқли вентилятор билан жиҳозланган. Янги аэродинамик пичоқлар статик босимни ошириб, шу билан бирга шовқин даражасини пастроқ ушлаб туриши айтилмоқда.