Фаршид Карими: Игор Сергеев "Персеполис"да порлашига ишонаман
Ўзбекистон миллий терма жамоаси ҳужумчиси Игор Сергеевнинг “Персеполис”га кўчиши Эрон футбол жамоатчилигида ҳам қизғин муҳокама қилинмоқда. Бу трансфер ҳақида эронлик собиқ дарвозабон, ҳозирда эса футбол агенти сифатида фаолият юритаётган Фаршид Карими ҳам ўз фикрларини билдирди.
Каримининг айтишича, у агентлик йўлини бошлаган илк даврларидаёқ Игор Сергеевни Эрон чемпионатига олиб келишни мақсад қилган. Бироқ бу режа дарҳол амалга ошмаган. Шунга қарамай, у бу орзу ортидан тўхтамай ҳаракат қилганини таъкидлади ва ниҳоят ўз мақсадига етиб келганидан мамнунлигини яширмади.
— Мен агентлик фаолиятимни бошлаганимда, Эронга олиб келишга интилган биринчи футболчим Игор Сергеев эди. Орадан анча вақт ўтиб, ниҳоят уни Эрон футболига олиб киришга муваффақ бўлганимиздан хурсандман, — деди Карими.
Футбол агенти Сергеевнинг янги клубидаги келажагига ҳам катта умид билдирди. Унинг сўзларига кўра, Игор “Персеполис” сафида ўз салоҳиятини тўлиқ намоён этиши, мухлисларни хурсанд қилиши ва ҳақиқий етакчилардан бирига айланиши мумкин.
— Умид қиламанки, Игор “Персеполис”да порлайди. Уни олдинда ажойиб мавсум кутиб турибди, — дея қўшимча қилди Карими.
Маълумот ўрнида, Игор Сергеев форс клуби билан 1,5 йиллик шартнома имзолаган. Энди эса барча эътибор — унинг янги жамоадаги илк қадамлари, биринчи голлари ва “Персеполис” ҳужумида қандай рол ўйнашига қаратилган.