Politico: АҚШ Гренландия устидан назорат ўрнатишга 2026 йилда уриниши мумкин
Politico манбаларига кўра, АҚШ яқин ойлар ичида Гренландия устидан таъсирини кучайтириб, назорат ўрнатиш йўлида ҳаракат бошлаши мумкин. Нашрнинг ёзишича, Вашингтон бу жараённи ноябр ойидаги Конгрессга оралиқ сайловлар ёки 4 июл куни нишонланадиган АҚШ мустақиллигининг 250 йиллигига боғлашни кўзлаяпти. Бу ҳақда kursiv.uz хабар беради.
Eurasia Group таҳлилий марказининг Европа бўлими бошқарувчи директори Мужтаба Раҳмон Politico’га берган изоҳида, АҚШ бу масалада Венесуэладаги каби кескин сценарийни танламаслиги эҳтимолини билдирди. Унинг фикрича, Вашингтон ҳозирги кучлар мувозанатини ўзгартириш учун "сиёсий таъсир кампанияси"ни ишга солиши мумкин.
Раҳмон маҳаллий сиёсатчиларни оғдириш ёки молиявий рағбатлантиришга уринишлар бўлиши, натижада АҚШнинг ҳарбий ва фуқаровий иштироки кенгайиши эҳтимолини ҳам истисно этмади. У бундай сценарий "реал ва жиддий" эканини таъкидлади.
2025 йил январида Оқ уйга қайтган Дональд Трамп бир неча бор Гренландияни АҚШга қўшиб олиш нияти борлигини айтган. 4 январ куни The Atlantic нашрига берган интервьюсида у оролни АҚШ мудофааси учун "мутлақо зарур" деб атаб, минтақада Россия ва Хитой кемалари борлигини эслатган.
Reuters қайд этишича, АҚШнинг Венесуэладаги ҳаракатлари Европа етакчиларда Гренландия ҳам шунга ўхшаш босим сценарийсига дуч келиши мумкинлиги ҳақидаги хавотирларни кучайтирган.