Актриса Айсанем Юсупова 29 ёшни қарши олди
Клиплардаги роллари билан танилган, “Ўзбек қизи” фильми орқали кенг оммага танилган асли қорақалпоғистонлик актриса Айсанем Юсупова 2 январь куни 29 ёшга тўлганини нишонлади.
Айсанемнинг айтишича, у санъатга аввал қўшиқчилик орқали қизиқиб кирган — бу йўлга онасининг орзуси ва қўллаб-қувватлаши туртки бўлган. Кейинчалик у Тошкентда санъат олийгоҳида ўқишга кириб, иккинчи уринишда имтиҳонлардан муваффақиятли ўтиб, актрисалик йўлини танлаган.
Кинога кириб келишида устози раҳматли Жўра Маҳмудовнинг ташаббуси муҳим бўлгани таъкидланади: у биринчи курсдаёқ Айсанемни кастингларда қўллаб-қувватлаган. Дастлабки катта таклифлардан бири режиссёр Ҳилол Насимов томонидан “Ҳаёт” фильмига бўлган.
Айсанем у учун энг катта синовлардан бири — “Ўзбек қизи” картинаси бўлгани ҳақида ҳам сўзлаб берди. У бу фильм жисмонан ҳам, руҳан ҳам оғир кечганини, тайёргарлик, дубльлар ва жароҳатлар бўлганини яширмайди. Шу билан бирга, айнан шу лойиҳа унинг ижодида алоҳида босқич сифатида қайд этилади.
Айсанем актрисаликдан асосий мақсади — яхши роллар орқали халққа манфаатли, эсда қоладиган ишлар қолдириш эканини айтади.