А Серия. «Рома» «Сассуоло»ни енгиб, 3-ўринга кўтарилди (видео)
А Сериянинг 20-турида «Рома» «Сассуоло» устидан 2:0 ҳисобида ғалаба қозонди. Римликлар учрашув тақдирини сўнгги дақиқаларга яқин ҳал қилди: ҳар икки гол ҳам 77-дақиқадан кейин урилди.
Биринчи бўлимда «Рома» тўп назоратида ҳам, жарима майдонига кириб боришлар сонида ҳам устун кўринди, бироқ якунловчи зарбаларда аниқлик етишмади. Жумладан, Дибала жарима майдони марказидан зарба берганида тўп нишондан четга ўтди. Орада Фергюсон бел қисмидан жароҳат олиб, ўйинни давом эттира олмади ва унинг ўрнига Эл-Шаарави майдонга тушди.
«Сассуоло» асосан кам сонли қарши ҳужумлар билан жавоб қайтарди. Энг хавфли вазиятда Фадера Матичнинг пасидан сўнг зарба берди, бироқ дарвозабон Свилар яқин бурчакдаги зарбани қайтариб, жамоасини қутқариб қолди.
Танаффусдан кейин «жаллоросси» қанотлар орқали босимни янада кучайтирди: Цимикас ва Челик мунтазам равишда жарима майдонига узатмалар йўллади. 62-дақиқада ҳакам Муричнинг Соулега қарши ишлатган қўпол ҳаракати учун пенальти белгилади, аммо VAR офсайдни қайд этиб, қарор бекор қилинди.
Шунга қарамай, «бўрилар» рақибини синдира олди. 77-дақиқада Соуле қанотдан аниқ оширди, Коне эса ҳаводаги курашда устун келиб, бош билан ҳисобни очди. Орадан кўп ўтмай «Сассуоло» олдинга ўтиб кетиб, ортда бўшлиқлар қолдирди ва «Рома» бундан фойдаланди: 79-дақиқада Соуле Гилардининг узатмасини голга айлантириб, ҳисобни 2:0 кўринишига келтирди.
А Серия. 20-тур
Рома – Сассуоло 2:0
Голлар: Коне 76, Соуле 79
Рома – Свилар, Жиларди, Манчини, Эрмосо, Челик, Коне, Писилли, Цимакас (Весли, 62), Соуле, Фергюсон (Эл Шаарави, 39), Дибала.
Сассуоло – Мурич, Валукиевиш, Идзес, Муҳаремович, Доиг, Липани, Матич, Коне, Фадера (Чеддира, 73), Пинамонти, Лаурент.