Мирзо Улуғбекда Lacetti ҳайдовчиси ЙПХ ходимини уриб кетди
Тошкент шаҳрида хизмат вазифасини бажараётган ЙПХ инспектори иштирокида йўл-транспорт ҳодисаси қайд этилди. Пойтахт ИИББ ЙҲХБ матбуот хизмати маълум қилишича, инспекторни Lacetti русумли автомашина ҳайдовчиси уриб юборган.
Қайд этилишича, воқеа жорий йил 22 январь куни соат 17:30 атрофида Мирзо Улуғбек туманидаги Шаҳрисабз ва Мустақиллик шоҳ кўчалари чорраҳасида содир бўлган. 2000 йилда туғилган Lacetti ҳайдовчиси кескин чапга бурилишга уринган пайтда, чорраҳада хизмат олиб бораётган ЙПХ ходимини уриб кетган.
ЙТҲдан сўнг инспекторга шифокорлар томонидан биринчи тиббий ёрдам кўрсатилган. Айни пайтда мазкур ҳолат бўйича Тошкент шаҳар ИИББ ЙҲХБ томонидан терговга қадар суриштирув ишлари олиб борилмоқда.
Эслатиб ўтамиз, аввалроқ Наманганда Onix ҳайдовчиси ЙПХ инспекторини уриб юбориб, унинг вафотига сабаб бўлган ҳолат ҳақида ҳам хабар берилган эди. Шунингдек, бошқа бир воқеада Тошкент вилоятида 18 ёшли йигитлар автомобил ўғирлаб, ИИБ ҳамда ЙПХ ходимларини жароҳатлагани тўғрисида маълумот тарқалган.