Собиқ «Фенербахче» футболчиси: Моуриньо сўзида турмади, деди
«Фенербахче»нинг собиқ футболчиси Линколн Жозе Моуриньони кескин танқид қилди. Португалиялик мутахассис Истанбул клубини 2024–2025 йилларда бошқарган. Бу ҳақда euro-football.ru хабар беради.
Линколннинг айтишича, Моуриньо унга берган ваъдасини бажармаган ва бу ҳолат футболчида ҳурматсизлик сифатида таассурот қолдирган. «У жуда кўп ютуқларга эришган, буни ҳеч ким инкор қилмайди. Аммо мен учун ҳаётда характер совринлардан ҳам муҳим», — деди у Fanatik нашрига берган интервьюсида.
Футболчи ижара асосида «Халл Сити»га кетишидан олдин Моуриньо билан гаплашгани, мураббий эса уни Португалиядаги ёзги йиғинда кўришни исташини билдирганини таъкидлади. Линколн мавсумни Англияда якунлаб, йиғинга чақирув кутган, бироқ кейинчалик Моуриньо у билан мулоқот қилишдан бош тортиб, спорт директорига мурожаат қилишни айтган.
Линколннинг сўзларига кўра, жамоа Португалияда бўлган пайтда у ҳам Португалияда уйида эди, шунга қарамай мураббий уни Истанбулга юбориб, алоҳида шуғулланишни буюрган. «Менга нисбатан адолатсиз ва ҳурматсиз муносабат бўлди», — дея қўшимча қилди у.
У, шунингдек, клуб учун кўп ўйинларда ҳатто ўз позициясида бўлмаса ҳам бор кучини берганини, оғир жароҳатдан кейин эса қўллаб-қувватлаш кутгани, аммо буни ҳис қилмаганини айтди. «Мен бошқалар каби машҳур футболчи бўлмаслигим мумкин, лекин майдонда доим охиригача ҳаракат қилганман», — деди Линколн.
Ҳозирда Жозе Моуриньо «Бенфика»ни бошқармоқда.