Валенсия 90-дақиқадаги пеналтидан кейин Эспанолни енгди
Ла Лиганинг 21-турида “Валенсия” “Месталья”да “Эспанол”ни қабул қилди. Мезбонлар ҳужумда унча кўп вазият ярата олмаган бўлса-да, уч очкони сўнгги дақиқаларда илиб кетди. Бу ҳақда euro-football.ru хабар беради.
Ҳисоб 15-дақиқада очилди: Лукас Белтран жарима майдонида Уго Дурони топди ва ҳужумчи яқин масофадан аниқ зарба билан “Валенсия”ни олдинга олиб чиқди. Иккинчи бўлим бошида “Эспанол” жавоб қайтарди — 54-дақиқада Кике Гарсиянинг зарбасини дарвозабон қайтаргач, Рамон Терратс тўпни қайта ҳужумда дарвозага жойлаб қўйди (1:1).
Орадан беш дақиқа ўтиб, Арно Данжумадан узатилган тўпга Эрай Кўмерт бош билан зарба бериб, мезбонларни яна олдинга чиқариб қўйди — 2:1. Аммо 79-дақиқада “Валенсия” омад кулиб боқмади: бурчак зарбасидан кейинги эпизодда Хосе Копете тўпни ўз дарвозасига йўналтириб юборди ва ҳисоб тенглашди — 2:2.
Учрашув тақдирини 90-дақиқада қўйилган пеналти ҳал қилди. Белтран ишлаб берган 11 метрлик жаримани Ларджи Рамазани совуққонлик билан аниқ ижро этди — 3:2.
Ғалабадан сўнг “Валенсия” турнир жадвалида 13-ўринда қолмоқда. “Эспанол” эса 5-поғонада, бироқ сўнгги тўрт турда атиги бир очко тўплади.