«Милан» билан ўйинда Ману Коне жароҳат олиб майдонни тарк этди
Италия А Сериясининг якшанба кунги сўнгги учрашувида «Милан» ва «Рома» ўзаро тўқнаш келар экан, римликлар ярим ҳимоячиси Ману Коне учун баҳс нохуш якун топди. Француз футболчи ўйиннинг тахминан 60-дақиқалари атрофида жароҳат олди. Бу ҳақда euro-football.ru хабар беради.
Коне майдонни ўзи тарк этди, бироқ анча оқсаб юрди ва сонининг орқа қисмидан ушлаб олди. Унинг ўрнига Николо Пиццилли майдонга туширилди. Дастлабки тахминларга кўра, Коне «Рома»нинг бир нечта учрашувини ўтказиб юбориши мумкин.
Эслатиб ўтамиз, ҳозирда «Рома» А Серия турнир жадвалида бешинчи ўринда бормоқда, «Милан» эса иккинчи поғонани эгаллаб турибди.