Килиан Мбаппе: «Реал» расво ўйнади. Барқарорлик етишмаяпти...
Европа Чемпионлар лигасининг умумий босқичи 8-турида “Реал” Лиссабонда “Бенфика”га 2:4 ҳисобида мағлуб бўлди. Бу натижа мадридликлар учун жуда оғир тушди: жамоа 1/8 финалга тўғридан-тўғри йўлланмани қўлга кирита олмади ва энди қўшимча ўтиш босқичида майдонга тушади. Учрашувдан кейин “қаймоқранглилар” ҳужумчиси Килиан Мбаппе очиқ ва қаттиқ танқид руҳида гапирди — гапини айлантирмади, ўзини ҳам, жамоани ҳам “ҳақиқат” билан урди.
Франциялик юлдузнинг биринчи гапи жуда кескин бўлди:
“Биз жуда расво ўйнадик...”, — деди Мбаппе.
У, айниқса, ўйин охирига яқин урилган тўртинчи гол ҳақида ҳам аниқ фикр билдирди. Мбаппега кўра, ҳисоб 2:3 бўлиб турган пайтда ўтказиб юборилган тўртинчи гол натижага жиддий таъсир қилмаган, аммо вазиятни янада оғирлаштириб, психологик зарбани кучайтирган:
“Ҳисоб 2:3 бўлиб — ютқазиб турган пайтимизда урилган тўртинчи гол ҳеч нарсани ўзгартирмади. Бу бироз уятли, лекин ҳеч нимани ўзгартирмайди”, — деган у.
Мбаппе “Реал”да ҳозирги асосий муаммо сифатида барқарорлик етишмаётганини тилга олди. Унинг айтишича, ўтган ҳафта жамоа бир неча яхши ўйин ўтказган, аммо “Бенфика”га қарши баҳсда у кайфият ҳам, ўйин сифати ҳам йўқолган:
“Ўтган ҳафта бир нечта яхши ўйинлар ўтказгандик, аммо ҳозир ундай эмас. Барқарорлик етишмаяпти”.
Энг муҳими, Мбаппе муаммони битта нуқтага тиқиб қўймади. У “айб фақат муносабатда” ёки “айб фақат тактикада” деб қочиб кетмади, аксинча, барчаси бир-бирига боғлиқ, деган фикрни айтди:
“Бизга ҳамма нарсадан оз-оздан етишмаяпти… Муаммо фақат муносабатда ёки фақат ўйин қурилишида деб айтмайман. Менимча, бу — комплекс муаммо”.
Мбаппе Чемпионлар лигасида майда-чуйда деган нарса бўлмаслигини ҳам эслаб ўтди: бу турнирда ҳар бир детал ҳал қилувчи аҳамиятга эга. Агар ғалаба учун зарур бўлган “ҳамма компонент” бир вақтнинг ўзида ишламаса, натижа ҳам шундай оғриқли чиқади.
Шунга қарамай, 27 ёшли футболчи умидни ўлдирмади. У мухлисларга мурожаат қилиб, жамоани айниқса яқинда бўладиган “Райо Валекано”га қарши ўйинда қўллаб-қувватлашга чақирди. Мбаппе “биз ҳали турнирдан чиқмадик” деган фикр билан мухлисларнинг руҳини кўтаришга ҳаракат қилди ва Ла Лигада ҳам вазият ёмон эмаслигини эслатди.
“Мухлислардан ‘Райо Валекано’га қарши ўйинга жамоани қўллаб-қувватлаш истаги билан келишларини сўрайман… Агар ‘Бернабеу’ бизни қўллаб-қувватласа, якшанба куни бизни ажойиб ўйин кутмоқда”, — дея Marca нашри Мбаппенинг сўзларини келтиради.
Хулоса қилиб айтганда, Мбаппенинг бу чиқиши оддий интервью эмас — “ўзимизни йиғиб олишимиз шарт” деган қаттиқ сигнал. “Реал” учун эса энди иккита вазифа бор: биринчиси — ўтиш босқичида хатосиз ўтиш, иккинчиси — барқарорликни тезроқ қайтариб, “Бернабеу”ни яна ишонтириш.