“Янги Ўзбекистон юлдузлари” мукофоти ғолиблари эълон қилинди
28 январь куни Тошкент шаҳридаги “Renessans Hall” мажмуасида “Янги Ўзбекистон юлдузлари” маданият ва санъат миллий мукофоти ғолибларини тақдирлаш маросими бўлиб ўтди. Ушбу тадбир мамлакат маданий ҳаётидаги муҳим воқеалардан бири сифатида санъат ихлосмандлари эътиборини тортди.
Маросимда йил давомида санъат ва маданият ривожига муносиб ҳисса қўшган ижодкорлар турли номинациялар бўйича эътироф этилди. Жумладан, мақом ижрочилиги йўналишида Озоджон Тилланазаров ва Наргизахон Рахмонова энг яхши эркак ва аёл хонандалар деб топилди. Опера санъатида Дамир Рахмонов, эстрада йўналишида эса Ғайбулла Турсунов ҳамда Дилноз Ҳакимова йилнинг энг яхшилари сифатида тақдирланди.
Театр ва кино соҳасида ҳам бир қатор ижодкорлар мукофотларга сазовор бўлди. “Икки қалб ноласи” йилнинг энг яхши спектакли, “Амалиётчи қиз” эса йилнинг энг яхши филми деб эълон қилинди. Улуғбек Ахмедов ва Райхона Убайдуллаева энг яхши театр актёри ва актрисаси, Қудрат Отажонов эса энг яхши режиссёр сифатида эътироф этилди.
Шунингдек, цирк, аския, кулги, бахшичилик, рақс ва тасвирий санъат йўналишларида ҳам йилнинг энг муносиб вакиллари тақдирланди. Ҳудудий ва жамоавий номинацияларда Жиззах вилояти Фориш тумани маданият маркази ҳамда “Дурдона” фольклор-этнографик жамоаси алоҳида эътирофга сазовор бўлди.
Тадбир якунида хорижда ўзбек маданиятини тарғиб этиб келаётган санъаткорлар ҳам унутилмади. Қозоғистонда хизмат кўрсатган артист, ТУРКСОЙ ташкилоти бўлим бошлиғи Арман Нурмахаматули “Йилнинг энг яхши хориждаги ўзбек маданияти тарғиботчиси” мукофоти билан тақдирланди.
Мазкур мукофот маросими санъаткорлар меҳнатини қадрлаш, уларни янги ижодий ютуқларга руҳлантиришга хизмат қилиши билан аҳамиятли бўлди.