Трампнинг рафиқаси "Мелания" ҳақидаги ҳужжатли фильм кинотеатрларга чиқди
АҚШ биринчи хоними Мелания Трамп ҳақида суратга олинган "Мелания" ҳужжатли фильми кинотеатрларда намойиш этила бошлади. Фильм 104 дақиқа давом этади ва унда Дональд Трампнинг 2025 йилдаги иккинчи инаугурацияси олдидан ўтган 20 кунлик давр акс эттирилгани айтилади.
Лекин кино бозорида бу лойиҳага нисбатан кайфият унчалик “байрамона” эмас: танқидчилар ва бир қатор таҳлилчилар катта харажатларига қарамай, фильмнинг прокатда омадли чиқиши шубҳа остида эканини ёзмоқда. Очиғи, гап реклама пулида ҳам: турли манбаларда маркетинг учун тахминан 35 млн доллар атрофида маблағ сарфлангани тилга олинади (айрим маълумотларда умумий келишув 75 млн доллар даражасида ҳам баҳоланган).
Фильмни Truth Social орқали Дональд Трампнинг ўзи ҳам фаол тарғиб қилган: у “албатта кўриш керак” деган мазмунда пост ёзган, 30 январь атрофида эса фильмни иккинчи марта ҳам томоша қилганини ва унга ёққанини билдирган.