Бензин нархини оширишни айтган раҳбар истеъфога чиқди
Германиядаги энг йирик автомобиль клубларидан бири — ADACнинг транспорт масалалари бўйича президенти Герҳард Ҳиллебранд истеъфога чиқди. Бу ҳолат унинг Neue Osnabrücker Zeitung газетасига берган интервьюсидан кейин юзага келган оммавий норозилик ортидан содир бўлди, деб хабар беради Bild нашри.
Hillebrand интервьюсида экологик тоза транспортга ўтишни рағбатлантириш учун бензин нархини ошириш кераклигини таъкидлаган эди. Унинг фикрича, одамлар дизель ва бензинли автомобиллардан электромобилларга ўтиши учун қатъий чоралар кўриш зарур.
Унинг бу таклифи клуб аъзолари орасида кескин эътирозларга сабаб бўлди. Расмий маълумотларга кўра, сўнгги тўрт ҳафта ичида 60 мингга яқин аъзо ADACдан чиқиб кетган. Бу ҳолат ADAC тарихида камдан-кам учрайдиган кўламдаги норозилик сифатида баҳоланмоқда.
Клуб раҳбарияти Ҳиллебранднинг фикрлари ташкилот нуқтаи назарини акс эттирмаслигини расман билдирган. Уларнинг таъкидлашича, ADAC барча учун ҳамёнбоп транспорт тарафдори бўлиб қолади ва ижтимоий адолатни бузувчи ҳар қандай қўшимча молиявий юкламаларга қарши чиқади.
ADAC, шунингдек, Ҳиллебранднинг чиқиши кўпчилик томонидан “автомобилчиларнинг манфаатларини ҳимоя қилишдан воз кечиш” сифатида қабул қилинганини тан олди ва бу бўйича тегишли хулоса чиқарилишини ваъда қилди.
Маълумот учун, ADAC Германияда 22 миллионга яқин аъзога эга бўлган йирик автомобиль клуби ҳисобланади.