Точилин: МОҚ қарори ФИФА ва УЕФАдаги банларга таъсир қилади
Футбол эксперти Александр Точилин «Евро-Футбол.Ру»га берган эксклюзив интервьюсида ФИФА президенти Жанни Инфантинонинг Россияга қўйилган таъқиқ бўйича фикрлари ва ОАВда тарқалган — МОҚ яқин орада Россия спортига нисбатан барча санкцияларни бекор қилиши мумкинлиги ҳақидаги хабарларга муносабат билдирди. Бу ҳақда euro-football.ru хабар беради.
Мутахассиснинг айтишича, МОҚ бу борада чиндан ҳам принципиал қарор қабул қилса, бунга ишонишни истайди. Унинг фикрича, Россиянинг йирик мусобақалардан четлатилиши узоқ давом этмоқда ва Европадан аниқ сиёсий қарор бўлмас экан, изоляцияни тугатиш қийин. Точилин шунингдек, Россиясиз катта турнирларнинг интрига ва оммабоплиги пасайишини ҳам таъкидлади.
Инфантинонинг россиялик жамоаларни четлатиш “маъносиз” экани ҳақидаги баёнотига тўхталган Точилин, дунёда Россияга нисбатан икки хил стандартлар ва бирёқлама ёндашув кузатилаётганини айтди. Шу билан бирга, у вазият ўзгараётганини, таъқиқнинг ўзи эса тобора “абсурд” кўриниш олаётганини қайд этди.
Точилин МОҚ санкцияларни бекор қилса, бу футболга ҳам бевосита таъсир кўрсатишини истисно этмади. Унинг сўзларига кўра, бундай ҳолатда “занжирли реакция” юз беради: бошқа ташкилотлар ҳам ўз қарорларини қайта кўриб чиқишга мажбур бўлади. Эксперт бу жараёнда энг муҳим савол “ким биринчи бўлади” деган масала эканини таъкидлади.
Инфантино келажакда сиёсат сабаб жамоаларни мусобақалардан четлатишни қонунан таъқиқлаш кераклигини айтгани ҳам эслатилди. Точилин эса спортнинг бош шиори — у сиёсатдан холи бўлиши лозимлигини, аммо Россияга нисбатан қабул қилинган қарорлар айнан шу тамойилга зид келаётганини билдирди.
ОАВда ФИФА апрел ойидаги навбатдаги конгрессда Россиянинг халқаро турнирларга тўлиқ қайтиши масаласини муҳокама қилиши мумкинлиги ҳақида ёзилмоқда. Точилин бундай муддатларда қайтиш эҳтимолини инкор этмади ва бу каби маълумотлар “бекордан-бекорга” тарқамаётганини айтди.
Шунингдек, Россия қайтганидан кейин ҳам айрим рақиблар майдонга тушишдан бош тортиши мумкинлиги ҳақидаги саволга эксперт регламентни эслатди. Унинг фикрича, қайси сабаб бўлишидан қатъи назар, қоидабузарлик бўлса, интизомий чоралар қўлланиши шарт. Техник мағлубиятлар берилиши бошқаларга ҳам сигнал бўлиб, бундай демаршлар охир-оқибат ўзига зарар келтиришини кўрсатади.
Елена Григорьевская