Булйкин Россиянинг футболга бансиз тезроқ қайтишини кутмоқда
Футбол эксперти Дмитрий Булйкин «Евро-Футбол.Ru»га берган эксклюзив интервьюсида ФИФА президенти Жанни Инфантино Россияга қўйилган тақиқни бекор қилиш кераклиги ҳақидаги фикрлари ҳамда ОАВда тарқалган — ХОК яқин келажакда россиялик спортчиларга қўйилган санкцияларни олиб ташлашга яқин экани борасидаги хабарларни изоҳлади. Бу ҳақда euro-football.ru хабар беради.
Булйкиннинг айтишича, у 2028 йилга бориб россияликларнинг мусобақаларга қайтиши ҳақида гапларни эшитган ва бунга ишонишни истайди. Эксперт футбол ҳам бундан четда қолмаслигини, энг муҳими жараён тезлашишини кутаётганини таъкидлади.
Шу билан бирга, у Беларусь терма жамоаси билан ўйнашдан бош тортаётганлар борлигини эслатиб, бу ҳолат ижобий сигнал эмаслигини айтди. Унинг фикрича, масалалар майдонда ҳал бўлиши керак — ким кучли экани футбол орқали исботлансин, бюрократик тўсиқлар ёки ўзаро четлатишлар орқали эмас.
Булйкин Европада Эстония ва Литванинг ўсмирлар жамоаларига Беларусьга қарши ўйнамагани учун техник мағлубият ёзилгани ҳақидаги ҳолатни ҳам тилга олди. УЕФАнинг бундай қарори айрим жамоаларнинг ўйнашни истамаслиги фонида муаммони тартибга солишнинг амалий йўли бўлиши мумкинлигини билдирди.
Экспертнинг фикрича, ФИФА ва УЕФА қатъий позиция танласа, “ўйнамаймиз” деган йўл ишламайди. Шундагина спорт тамойиллари сақланиб қолади.
Булйкин ХОК санкцияларни бекор қилса ҳам, бу футбол учун автоматик тарзда домино эффекти бермаслигини қайд этди. Унинг таъкидлашича, Олимпия ҳаракати — бир тизим, футбол эса бошқа механизмлар ва қарорлар билан яшайди.
Шунга қарамай, у Россия спорти ҳам, футбол ҳам имкони борича тезроқ халқаро мусобақаларга қайтиши зарурлигини алоҳида урғулади.
Инфантинонинг Россия терма жамоалари четлатилиши “маънсиз” экани ҳақидаги сўзларига муносабат билдирар экан, Булйкин баёнотлар кўп бўлаётганини, аммо ҳозирча реал қарорлар кўринмаётганини айтди. Бироқ у яқин орада вазият “музлаган нуқта”дан силжиши ва спортчилар байроқ ҳамда мадҳияси билан мусобақаларга қайтиши мумкинлигига умид билдирди.
ФИФА раҳбари келажакда сиёсат сабаб жамоаларни мусобақалардан четлатишни қонунан тақиқлаш кераклигини ҳам айтган. Булйкин бундай ёндашувни қўллаб-қувватлаб, футбол аслида доим сиёсатдан холи бўлиши кераклигини эслатди, аммо ҳозир айнан сиёсий омил олдинга чиқиб кетганини таъкидлади.
Россияга қўйилган тақиқ қачон бекор бўлиши мумкинлиги ҳақида гапирар экан, эксперт жараён чўзилиб кетмайди деган фикрни билдирди. У камида ўсмирлар ва аёллар терма жамоаларини тезроқ қайтариш ҳам катта биринчи қадам бўлишини, идеал вариант эса барча жамоаларнинг бирданига мусобақаларга қўйилиши эканини айтди.
2026 йилнинг ўзидаёқ бuni амалга ошириш масаласи бўйича эса Булйкин вазифа жуда қийин бўлишини, бироқ барибир энг яхши томонга умид сақланиб қолишини таъкидлади.