Булыкин Россия банига тез орада ечим чиқишига ишонади
Футбол эксперти Дмитрий Булыкин «Евро-Футбол.Ru»га берган эксклюзив интервьюсида ФИФА президенти Жанни Инфантинонинг Россияга қўйилган тақиқ бўйича фикрлари ҳамда ОАВда тарқалган ХОҚ яқин келажакда россиялик спортчиларга қўйилган санкцияларни бекор қилиши мумкинлиги ҳақидаги хабарларга муносабат билдирди. Бу ҳақда euro-football.ru хабар беради.
Булыкиннинг айтишича, 2028 йилга келиб россияликларни мусобақаларга қайтариш ғояси муҳокама қилинмоқда. У футбол ҳам бундан четда қолмаслигини хоҳлашини, энг муҳими жараён имкони қадар тезлашишини таъкидлади. Шу билан бирга, у Беларусь терма жамоаси билан ўйинлардан бош тортиш ҳолатларини салбий мисол сифатида эслатиб, масала майдонда кучни исботлаш орқали ҳал бўлиши кераклигини қайд этди.
Эстония ва Литванинг ўсмирлар жамоалари Беларусь билан ўйнашдан бош тортгани учун техник мағлубият олгани юзасидан эса Булыкин УЕФАнинг бундай қарорини зарур чорага йўйди. Унинг фикрича, кўплаб жамоалар ўйнашни истамаётган бир пайтда муаммони айнан шундай қатъий позиция билангина жиловлаш мумкин.
ХОҚ санкцияларни бекор қилса, ФИФА ва УЕФА ҳам шу йўлдан борадими, деган саволга Булыкин эҳтиёткорона жавоб берди: у Олимпия ўйинлари ва футболнинг механизмлари турлича эканини, шу сабаб автоматик “занжирли реакция” бўлишига унча ишонмаслигини айтди. Бироқ Россия учун ҳар икки йўналишда ҳам мусобақаларга тезроқ қайтиш муҳимлигини қўшимча қилди.
Инфантино Россия жамоаларини четлатишни “маънсиз” деб атагани ҳақида гапирар экан, Булыкин ФИФА раҳбари бу мавзуда кўп бор гапираётганини, аммо ҳозирча амалий қарор кўринмаётганини билдирди. Шунга қарамай, у яқин орада вазият “ўлик нуқта”дан силжиши ва россиялик спортчилар байроқ ҳамда мадҳияси билан мусобақаларга қайтишига умид қилди.
Инфантино келажакда сиёсат сабаб жамоаларни мусобақалардан четлатишни қонунан тақиқлаш кераклигини айтгани борасида ҳам Булыкин бу ташаббусни қўллаб-қувватлашини маълум қилди. Унинг сўзларига кўра, футбол аслида сиёсатдан ташқарида бўлиши керак, бироқ ҳозир нимагадир сиёсий омил биринчи ўринга чиқиб қолган.
Булыкин тақиқ қачон олиб ташланиши мумкинлиги ҳақида узоқ чўзилмаслигига ишонишини айтди. У аввало ўсмирлар ва аёллар терма жамоаларини мусобақаларга қайтариш катта қадам бўлишини, аммо энг тўғриси барча жамоаларга бир вақтнинг ўзида рухсат берилиши эканини таъкидлади.
2026 йилда буни амалга ошириш қанчалик реал, деган саволга эса у буни қилиш жуда қийин бўлишини, шундай бўлса-да, ижобий якунига умид доим борлигини билдирди.