Точилин МОК қарори FIFA ва UEFAdagi бан масаласига таъсир қилади

Футбол эксперти Александр Точилин «Евро-Футбол.Ru» нашрига берган интервьюсида FIFA президенти Жанни Инфантинонинг Россия жамоаларига қўйилган тақиқни бекор қилиш ҳақидаги фикрлари ҳамда МОК яқин орада Россия спортига нисбатан барча санкцияларни олиб ташлаши мумкинлиги ҳақидаги хабарларга муносабат билдирди. Бу ҳақда euro-football.ru хабар беради.

Точилиннинг айтишича, оммавий ахборот воситаларида тилга олинаётган, Миландаги МОК йиғилишида санкцияларни бекор қилиш бўйича принципиал қарор қабул қилингани ҳақидаги гапларга ишонишни истайди. У бундай масала узоқ вақтдан бери муҳокама қилинаётганини, изоляцияни тугатиш учун Европа даражасида қатъий қарор зарурлигини таъкидлади.

Экспертнинг фикрича, халқаро спорт ҳамжамияти Россиясиз йирик мусобақаларнинг интрига ва оммабоплиги пасайишини ҳам яхши тушунади. Шунинг учун у бу баёнотлар амалий қадамлар билан мустаҳкамланишига умид билдирди.

Инфантинонинг Россия жамоаларини четлатиш “маънсиз” деган позициясига тўхталган Точилин буни дунёда кузатилаётган умумий тенденция билан изоҳлади. У Россияга нисбатан икки хил стандарт ва бирёқлама ёндашувлар борлигини айтар экан, вақт ўтиши билан бундай бан “абсурд ҳолат” экани кўпроқ англанаётганини қўшимча қилди.

Точилин МОК санкцияларни олиб ташласа, бу футболга ҳам бевосита таъсир қилишини қайд этди. Унинг фикрича, бундай қарор занжирли реакция келтириб чиқаради ва бошқа спорт ташкилотлари ҳам аввалги қарорларини қайта кўриб чиқишга мажбур бўлади.

“Бу ерда энг муҳими — ким биринчи бўлади”, дея таъкидлади у. Точилинча, МОК каби йирик тузилма прецеденти юзага келтирса, нисбатан кичикроқ ташкилотлар ҳам ўша йўлдан бориши эҳтимоли юқори.

Инфантино келажакда сиёсат сабаб жамоаларни четлатишни қонуний жиҳатдан тақиқлаш кераклигини айтгани борасида эса Точилин спортнинг асосий шиори сиёсатдан холи бўлиши кераклигини эслатди. Унга кўра, Россияга нисбатан қабул қилинган қарорлар айнан шу тамойилга зид.

Шунингдек, ОАВда FIFA апрел ойидаги конгрессда Россиянинг халқаро турнирларга тўлиқ қайтиши масаласини кўриб чиқиши мумкинлиги ҳақидаги хабарлар ҳам муҳокама қилинди. Точилин бундай суҳбатлар бор экан, қайтиш эҳтимолини инкор этмади ва бу маълумотлар “бекордан-бекор” чиқаётганини таъкидлади.

Эксперт Россия қайтган тақдирда ҳам айрим жамоалар майдонга тушишдан бош тортиши мумкинлигини тан олди. Унинг фикрича, бундай вазиятларда ҳар бир ташкилот ўз регламенти асосида иш юритиши, қоидабузарлик бўлса интизомий чоралар қўлланиши керак.

Точилиннинг айтишича, агар кимларгадир техник мағлубият ёзилса, бу бошқаларга ҳам сигнал бўлади. У бундай демаршлар ҳеч кимга фойда келтирмаслигини, аксинча, рад этаётган томоннинг ўзига зарар бўлиши мумкинлигини таъкидлади.