«Марсел»нинг спорт директори Бенатия лавозимини тарк этмоқда
Франциянинг «Марсел» клубида спорт директори лавозимида ишлаган Меҳди Бенатия истеъфога кетаётганини маълум қилди. Марокашлик футбол функционери бу ҳақдаги хабарни ижтимоий тармоқлардаги саҳифалари орқали эълон қилди. Бу ҳақда euro-football.ru хабар беради.
Аввалроқ клуб раҳбарияти Бенатияни қўйиб юбормаслиги, у эса ўз хоҳишига кўра лавозимни тарк этишни истаётгани ҳақида хабарлар тарқалган эди.
«Мен ҳақиқатан ҳам истеъфо бердим (шунчаки таклиф қилганим йўқ). Менинг қолишим ташкилот ва унинг ривожи учун тўсиқ ёки ортиқча юк бўлишини истамайман. Сўнгги пайтларда норозилик кучайиб бораётганини ва муносабатларда узилиш пайдо бўлганини сездим, бундан жуда афсусдаман», — деб ёзди Бенатия.
Эслатиб ўтамиз, бир неча кун аввал «Марсел» бош мураббий Роберто де Дзерби ҳам лавозимидан кетгани эълон қилинганди.
Ҳозирда провансликлар Лига 1 турнир жадвалида 40 очко билан тўртинчи ўринда бормоқда.