Элдор Шомуродов футбол академияси ва TBC Bank: болалик орзуларидан катта футболгача
Ҳар бир буюк ҳикоянинг ўз бошланиши бор. Баъзан у сокин бўлиб, орқа ҳовлида, эски тўп ва болаларча ўзига ишонч билан бошланади.
Кимдир ўқитувчи бўлишни хоҳласа, кимдир шифокор бўлишни орзу қилади. Яна бирлари эса болалигидан ўзларини катта стадионда кўриб, бир кун келиб Жаҳон чемпионатида Ўзбекистон шарафини ҳимоя қилишига ишонади. Элдор Шомуродовнинг ҳикояси ҳам шундай бошланган.
Бугун у бир пайтлар ўзидек катта майдонларда ўйнашни орзу қилувчи болаларга ёрдам беради. Сурхондарё вилоятида, Термиз яқинида жойлашган Элдор Шомуродов академиясида болалар яшайди, ўқийди ва ҳар куни орзуларига яқинлашиш учун кичик, лекин муҳим қадамлар қўяди.
TBC Банк жамоаси буларнинг барчасини ўз кўзлари билан кўриш учун академияга ташриф буюрди. Болаларнинг самимийлиги ва қатъиятлилиги, шунингдек, ҳали кўплаб катталарга болалик орзусидек кўринадиган нарсага жиддий ёндашаётгани жамоани илҳомлантирди. Шу сабабли TBC Bank жамоаси уларнинг ёнида бўлишни, қўллаб-қувватлашни ва бу йўлда бирга ҳаракат қилишни ўз олдига мақсад қилди.
Эҳтимол, кимнингдир буюк футбол йўли чиндан ҳам шу ерда, Сурхондарёнинг жазирама қуёши остидаги майдондан бошланар.
Ҳаётни ўзгартирувчи имконият
Академияда Сурхондарё вилоятидаги турли оилалардан келган болалар шуғулланади. Бу ерда оиланинг даромади муҳим эмас. Энг асосийси — бола футболга қизиқадими, характери қандай ва тинимсиз ишлашга тайёрми.
“Болалар академияда бепул ўқийди. Биз учун энг муҳими оиланинг молиявий ҳолати эмас, балки боланинг футболга бўлган қизиқиши, қобилияти ва мақсад сари интилиши. Агар бу фазилатлар мавжуд бўлса, у қайси оиладан эканлигидан қатъи назар қабул қилинади”, — дейди Сурхондарё вилояти футбол федерацияси раҳбари ва Элдор Шомуродовнинг акаси Санжар Шомуродов.
Ҳозирги кунда академияда 132 нафар бола таҳсил олмоқда. Қабул ҳар йили июль ва август ойларида ўтказилади. Академияга 12 ёшдан бошлаб, аввал спорт мактабида машғулотларга қатнашган болалар қабул қилинади.
Бу ерда футбол шунчаки техника ва тезлик эмаслигини, характер ва ирода ҳам муҳим эканини яхши тушунишади. Болалар билан психологлар ҳам ишлайди. Ғалаба ёки мағлубият болаларга турлича таъсир этади, шунинг учун улар ўзларини доимо қўллаб-қувватланган ҳис қилиши муҳим.
Агар кимдир қийинчиликка дуч келса, унга жадвалга мослаштирилган қўшимча машғулотлар белгиланади. Болалар кундалик машғулотлардан ташқари спорт залида ҳам шуғулланиб, нафақат жисмонан, балки руҳий жиҳатдан ҳам мустаҳкамланиш имконига эга.
“Футбол” деб номланган орзу
Зайниддин Амадуллаев 12 ёшда. У бир неча йилдан бери академия машғулотларига қатнашади ва жамоаси билан бирга ўсиб бормоқда.
“Отам сабабли футболга муҳаббат қўйдим. Етти ёшимдан бери ҳар куни машқ қиламан, ҳар куни ўзимни яхшилашга интиламан. Ҳозирча катта қийинчиликлар йўқ, кунига тахминан уч соат футбол билан шуғулланаман ва Элдор акам каби кучли футболчи бўлишни орзу қиламан”, — дейди Зайниддин.
Болалардан орзулари нима эканлигини сўрасангиз, жавоб деярли бир овоздан: профессионал футболчи бўлиш.
Уларнинг сўзларида шубҳа йўқ — фақат самимийлик ва тинимсиз ишлашга тайёрлик сезилади.
“Футболда тез натижалар бўлмайди. Бугун қаттиқ меҳнат қилиб, эртаси куниёқ муваффақиятга эришиб бўлмайди. Йиллар давомида интизом билан ишлаш ва ҳаракат қилиш керак, ва натижалар фақат вақт ўтиши билан келади”, — дейди Санжар Шомуродов.
Академиянинг асосий мақсади — энг юқори даражада рақобатлаша оладиган профессионал футболчиларни тарбиялаш. Кейинги беш йил ичида раҳбарият Суперлигага камида 20 нафар янги футболчини тайёрлашни режалаштирган.
Ҳамиша ёнингиздаги кўмак
Элдор Шомуродов ва TBC Банкни умумий мақсад бирлаштирди — болаларга ўзларига ишонишга ва йўл узоқ бўлса-да, орзуларидан ҳеч қачон воз кечмасликка ёрдам бериш.
Бугун йигитлар майдонга тушади, и, пас беришни машқ қилади, интизом ва жамоавий ўйин кўникмаларини ўрганади. Баъзилар учун бу шунчаки машғулот, аммо улар учун бу катта орзу сари яна бир қадамдир.
Ва эҳтимол, бир неча йилдан сўнг биз халқаро майдонда шу ерда — Сурхондарёдаги майдонда, болаликдаги ишонч ва керакли пайтда ёнларида бўлган катталарнинг қўллаб-қувватлаши билан ўз йўлини бошлаган футболчини кўрамиз.
Реклама ҳуқуқи асосида