Роберт Левандовский Барселонадаги келажаги ҳақида гапирди
Роберт Левандовски «Барселона»даги келажаги борасидаги миш-мишларга ниҳоят ойдинлик киритди. 37 ёшли ҳужумчининг каталонияликлар билан амалдаги шартномаси якунига етиб бораётгани футбол оламида қизғин муҳокамаларга сабаб бўлмоқда. Ханси Флик қўл остида ўйин амалиёти камайган тажрибали футболчи ўзининг кейинги қадамлари борасида шошилмасликка қарор қилган. Бу ҳақда goal.com хабар беради.
«Sky Sports» нашрига берган интервьюсида Левандовски ҳеч қандай босим ҳис қилмаётганини таъкидлади. Унинг сўзларига кўра, ёш ўтгани сари қарор қабул қилиш жараёни ўзгаради. Ҳужумчи келажаги борасида якуний тўхтамга келиш учун ўзига уч ойлик муҳлат берганини маълум қилди.
Гарчи футболчи Испаниядаги фаолиятидан мамнун бўлса-да, матбуотда унинг MLS лигасига ўтиши мумкинлиги ҳақида хабарлар кўпаймоқда. Хусусан, «Чикаго Файер» клуби полшалик тўпуарни эркин агент сифатида ўз сафига қўшиб олишга яқин турибди. Левандовски ўтмишдаги трансферларига тўхталар экан, «Боруссия Дортмунд»да ўйнаган даврида «Манчестер Юнайтед»га ўтиш имконияти бўлганини, бироқ клуб уни қўйиб юбормаганини эслади.
Жорий мавсумда Левандовски Ла Лигада атиги 10 та ўйинда асосий таркибда майдонга тушди. Ханси Флик ҳужум чизиғида Ферран Торресга кўпроқ ишонч билдирмоқда. Шунга қарамай, футболчи «Барселона»нинг мавсум якунида чемпионлик ва Европа кубоги учун курашида ўз ҳиссасини қўшишга тайёр. Унинг жамоа билан хайрлашуви айнан совринлар билан якунланиши ҳам истисно этилмаяпти.