Ёш таэквондочиларимиз Минскдаги мусобақада 16 та медал қўлга киритди
Беларус пойтахти Минск шаҳрида таэквондо WT бўйича ўтказилган нуфузли "Кубок силнейших спортсменов" халқаро турнири ўз якунига етди. Мазкур мусобақада юртимиз шарафини ҳимоя қилган Ўзбекистон ёшлар терма жамоаси аъзолари ўзларининг юқори маҳоратларини намойиш этиб, умумжамоа ҳисобида катта муваффақиятга эришдилар. Спортчиларимиз ушбу мусобақадан олдин Беларусда ташкил этилган халқаро ўқув-машғулот йиғинларида иштирок этиб, ўз тайёргарликларини янада мустаҳкамлаб олишган эди.
Қизғин ва муросасиз кечган баҳслар якунига кўра, вакилларимиз жами 16 та медални қўлга киритишга муваффақ бўлишди. Шулардан 6 таси олтин, 5 таси кумуш ва 5 таси бронза медалларидир. Шохсупанинг энг юқори поғонасига Шохжаҳон Холмуродов, Ёсинбек Одилов, Асадбек Самандаров, Омадбек Отабеков, Самира Ҳайитова ҳамда Ситора Асророва кўтарилишди. Улар ўз вазн тоифаларида рақибларига ҳеч қандай имконият қолдирмасдан, чемпионлик унвонига сазовор бўлишди.
Шунингдек, Фарҳод Қосимов, Шермуҳаммад Қаххоров, Азизбек Муродов, Зуҳра Исмоилбоева ва Фарангис Маҳкамбоева кумуш медаллар билан тақдирланишди. Бронза медаллари эса Аюбхон Набиев, Ахаджон Мухторов, Алишер Пак, Рушанахон Равшанова ҳамда Виктория Денисенко ҳисобига ёзилди. Ушбу натижалар ўзбек таэквондоси келажаги бўлган ёшларнинг халқаро майдондаги салоҳияти нақадар юқори эканлигини яна бир бор тасдиқлади. Мураббийлар штаби спортчиларимизнинг техник ва тактик тайёргарлигидан мамнун эканликларини билдириб, келгусидаги мусобақаларда ҳам шундай юксак марраларни забт этишни мақсад қилганликларини таъкидлашди.