Хави ҳақ эди: Мессининг "Барселона"га қайтиши атрофидаги можаро
Лионель Мессининг 2023 йилда "Барселона" клубига қайтмай қолгани билан боғлиқ можаро яна авж олди. Жамоанинг собиқ спорт директори Матеу Алемани Хави Эрнандеснинг сўзларини тасдиқлаб, клуб аргентиналик юлдузни қайтариш учун лигадан рухсат олганини маълум қилди. Бу эса президент Жоан Лапорта ва Ла Лига раҳбари Хавер Тебаснинг сайловлар олдидан айтган расмий баёнотларига мутлақо зиддир. Бу ҳақда goal.com хабар беради.
Ҳозирда "Атлетико" клубида ишлаётган Алемани 2021 йилдан 2023 йилгача "Барселона"да фаолият юритган. У Чемпионлар лигаси доирасидаги ўйин олдидан берган интервьюсида Хавининг воқеалар ривожи ҳақидаги талқини тўлиқ ҳақиқат эканини таъкидлади. "Хави ҳақ, улар бизга Ла Лигадан рухсат борлигини айтишган эди", деди Алемани.
Аввалроқ Хави Лапортани деярли ҳал бўлган трансферни барбод қилганликда айблаган эди. Унинг сўзларига кўра, раҳбарият "яшил чироқ" ёнганини айтган, аммо кейин кутилмаганда ҳаммаси бекор қилинган. Лапорта эса бу айбловларни рад этиб, собиқ мураббийни бўлажак президентлик сайловлари олдидан сиёсий ўйинлар қурбони бўлаётганини таъкидлади.
Лапортанинг таъкидлашича, трансфер раҳбариятнинг тақиқи туфайли эмас, балки футболчи вакиллари билан алоқа йўқолгани сабабли амалга ошмаган. У 2023 йилнинг май ойида Хорхе Мессига шартнома юборганини, аммо Хорхе ўғли босим остида қолишни истамай, "Интер Майами" клубига ўтишни маъқул кўрганини айтган. Ла Лига раҳбари Тебас ҳам бу фикрни қўллаб-қувватлаб, лига ҳеч қачон молиявий рухсат бермаганини ва расмий сўров ҳам бўлмаганини қўшимча қилди.
15 март куни бўлиб ўтадиган сайловлар олдидан президентликка номзод Виктор Фонт бу вазиятдан фойдаланиб, клубдан тўлиқ шаффофликни талаб қилмоқда. Хави томонидан қўллаб-қувватланаётган Фонт амалдаги раҳбарият ўз хатоларини Ханси Флик ва ёш иқтидорлар олиб келаётган муваффақиятлар ортига яшираётганини айтди. У Мессининг ўзи ҳам бу борада ҳақиқатни айтишига умид қилмоқда.