Малика Равшанова сунъий интеллект ёрдамида клип яратишга муносабат билдирди

Хонанда Малика Равшанова бир ой олдин «Кутаман» номли таронаси учун сунъий интеллект ёрдамида тайёрланган клипни мухлисларига тақдим этди.

Хонанданинг айтишича, бу ғоя унга ўғли томонидан таклиф қилинган. Унинг таъкидлашича, ҳозир кўпчилик сунъий интеллектга қарши бўлса-да, у бу технологияга салбий қарамайди.

«Ҳозир кўпчилик сунъий интеллектга қарши. Лекин мен қарши эмасман. Чунки янги она бўлган аёллар кўп ҳолларда экранга чиқишни хоҳламайди. Шундоқ ҳам камера бизни ҳаётдагидан кўра катта кўрсатади. Бир куни ўғлим: “Ойи, келинг, шу сунъий интеллект орқали клип яратамиз”, деди. Мен эса “Қандай бўларкан?” деб сўрадим. У эса: “Сиз доим тўрт фаслни ўз ичига олган клип суратга олишни хоҳлар эдингиз. Сунъий интеллект ҳаммасини беради”, деди», — дейди хонанда.

Суҳбат давомида хонандадан сунъий интеллект орқали клип яратиш арзон ёки қимматлиги ҳақида ҳам сўралди. Бу саволга Малика Равшанова шундай жавоб берди:

«Сунъий интеллект орқали клип тайёрлаш арзон эмас. Қанча маблағ сарфланганини айтмаймиз. Лекин шу пулга Ўзбекистонда битта яхши клип суратга олиш мумкин», — деди.

Шу билан бирга, хонанда сунъий интеллектдан овозни тўғирлашда фойдаланишга қарши эканини ҳам таъкидлади.

«Лекин овозларни ҳам сунъий интеллект орқали тўғирлашларига қаршиман. У ерда ҳиссиёт бўлмайди. Инсон ўз қўшиғида яшаши керак. Майли, сунъий интеллект оқали ғоя ёки йўналиш олсин, лекин қўшиқни инсоннинг ўзи куйлаши керак. Ана шундагина қўшиқ ҳақиқатан ҳам яшайди», — деб фикрини якунлади хонанда.