Холанд “Манчестер Сити”да қолиб, Ла Лига орзусини кечиктирмоқда
“Манчестер Сити” ҳужумчиси Эрлинг Холанд сўнгги вақтларда трансферлар атрофидаги энг кўп муҳокама қилинаётган футболчилардан бирига айланди. Айниқса, норвегиялик голеадор келажаги доимий равишда “Барселона” ва “Реал” каби гранд клублар билан боғланмоқда.
Испаниянинг нуфузли нашрларидан бири ҳисобланган El Nacional журналистлари бу масалани чуқур таҳлил қилиб чиқди. Манба берган маълумотларга кўра, 2025–2026 йилги мавсум якунланганидан сўнг ҳам Эрлинг Холанд клубини ўзгартириш ниятида эмас.
25 ёшли тўпурар ҳозирги пайтда фаолиятини “Манчестер Сити”да давом эттиришни энг тўғри ва манфаатли қарор деб ҳисобламоқда. Юқори маош, барқарор ўйин амалиёти ва жамоадаги қулай муҳит унинг бу қарорини мустаҳкамламоқда.
Шу билан бирга, Эрлинг Холанд келажакда Испаниянинг Ла Лига чемпионатида ўз кучини синаб кўришни исташини ҳам яширмаяпти. Бироқ у бу режа учун ҳали эрта эканини тушуниб турибди. Шу сабабли, келаётган ёзги трансфер ойнасида “Барселона” ёки “Реал”га ўтишни мақбул вариант сифатида кўрмаяпти.
Маълумотларга кўра, Эрлинг Холанднинг трансфер қиймати ҳозирда тахминан 200 миллион евро атрофида баҳоланмоқда. Унинг “Манчестер Сити” билан амалдаги шартномаси эса 2034 йил ёзигача мўлжалланган.
Қисқаси, Холанд ҳозирча Манчестердаги “миссияси”ни давом эттириш ниятида. Испания сафарини эса кейинга қолдирган — демак, интрига ҳали олдинда, мухлислар учун эса яна кўп гап-сўзлар тайёр.