Самвел Бабаян «Машъал»га қарши ўйиндан сўнг қандай фикр билдирди?
Суперлига 4-туридан ўрин олган «Андижон» – «Машъал» (2:0) ўйинидан кейинги матбуот анжуманида мезбонлар бош мураббийи Самвел Бабаян ўз фикрлари билан ўртоқлашди.
— Ассалому алайкум. Барча мухлисларимизни ғалаба билан табриклайман. Мағлубиятлардан кейин бу ғалаба бизга жуда керак эди. Футболчиларимизнинг бугунги учрашувга реакциялари ҳам муҳим эди. Йигитлар яхши футбол ва яхши темп кўрсатишди. Асосийси — ғалаба қозондик. Янада бемалол ҳаракат қилишимиз учун ҳисоб бундан ҳам йирик кўриниш бўлиши мумкин эди. Муҳими — жамоамизнинг майдонда ғалаба учун ўйнашидир. Яна алоҳида айтишим керакки, биз тикланиш жараёнини яхши ўтказдик.
Майдонда доминантлик қиладиган ўйинни кўрсатишга ҳаракат қиляпмиз. Ўйинчиларимизнинг 100 фоиз тўлиқ куч билан ҳаракат қилишини хоҳлаймиз. Асосий таркибда ўзгаришларга қўл урдик. Дамир Темиров асосий таркибда майдонга тушди. Тўлиқ ўйинимизни шакллантириб олиш учун бизга яна бироз вақт керак. Ўйлайманки, ўйинимиз янада очилади ва мухлисларимизни хурсанд қиламиз.
— Келаётган Рамазон ҳайити ва Наврўз байрами билан табриклайман. Кўриниб турибдики, сиз натижадан қониқдингиз. Ўйиндан ҳам қониқдингизми?
— Кузатган бўлсангиз мен ўйиннинг бошидан то охиригача ўтирганим йўқ. Баҳс давомида кўрсатмалар бериб турдим. Мураббий агар ўйиндан тўлиқ қониқдим деса, фаолиятини тугатса ҳам бўлади. Аввало, ўйинчиларга характер кўрсатишгани учун раҳмат. Муваффақиятсиз ўйинлардан сўнг ўзларини тиклаб, ғалаба учун курашишгани учун миннатдорчилик билдираман. Йигитлар ўзларини кўрсатишди, агрессив ҳаракат қилишди ва ҳужумларда фаол бўлишга интилишди. Прессингда яхши ўйнагани учун сардоримиз Драган Черанни алоҳида эътироф этган бўлардим. Бу борада фаоллик кўрсатиш бўйича рекорд қўйди, десам бўлаверади.
Голдан кейин яна ҳужумларимизни кучайтиришимиз лозим эди. Бу қалтис ҳисоб эди. Иккинчи бўлимда янада агрессив ўйнай бошладик. Рақибга босим ўтказишимиз билан улар хато қила бошлади. Биринчи бўлимда ҳам шундай қилишимиз керак эди, иккинчи бўлимда босим ўтказганимиз туфайли ижобий натижага эришдик. Майдонда бир футболчи кўп бўлиб ўйнаганингда, керакли услубни танлаган ҳолда ўйин кўрсатиш керак ва шунда кўзлаган мақсадга эришиш мумкин. Рақибни ўйин охиригача босимда ушлаб турдик.
— Жамоангизда хавфли ҳужумлар кўп бўлди, бироқ улардан етарли даражада фойдаланишда оқсаш кузатиляпти. Бу ҳақида фикрингиз?
— Биз кўп вазиятлар яратганимизни яхши ҳолат деб ўйлайман. Бу борада иш олиб боряпмиз. Бизда янги жамоа шаклланяпти. Жамоани нолдан қуришни бошладик. Шу сабабли кўп вазиятларда қайта ишлаш зарурлиги кўриниб турибди. Имкониятлардан унумли фойдаланиш бўйича керакли ишларни олиб борамиз ва бунинг ечими устида ишлаш ўзимизга боғлиқ.
Мамлакатимиздаги барча ишқибозларни юртимизда нишонланадиган Наврўз ва Рамазон Ҳайит байрами билан табриклаб, ҳаммага тинчлик-омонлик тилаб қоламан, — дея Бабаяннинг сўзларини келтиради клуб матбуот хизмати.