Ҳожатхонага ташлаб кетилган чақалоқ 28 йилдан сўнг оиласини топди...

Фото: mp.weixin.qq.com

Инсоният тарихида баъзан шундай воқеалар юз берадики, уларнинг замиридаги фожиа ва кейинги мўъжизавий бахт кишини ҳайратга солмай қўймайди. Хитойда юз берган бир оилавий драма ва орадан 28 йил ўтиб янграган шодлик садоси бугун дунё оммаси эътиборини тортмоқда. Zamin.uz мудҳиш тақдир синовларидан ўтиб, ўз илдизларини топган қизнинг ҳикоясини тақдим этади.

Хитойлик Хун Янли оилада учинчи қиз бўлиб дунёга келганида, ҳали ўзини қандай синовлар кутаётганини билмас эди. Унинг онаси Ян Сяоин эндигина туғруқдан кейин тикланаётган, отаси эса сафарда бўлган бир пайтда, хонадоннинг каттаси — бобо "неварага ўзим қарайман" дея чақалоқни олиб чиқиб кетади. Аммо қалбида фақат ўғил невара орзуси бўлган қария, ожиза гўдакни қўшни қишлоқдаги жамоат ҳожатхонасига ташлаб юборади.

Тасодифий нажот ва Европа сари йўл

Яратганнинг марҳамати билан йўловчилардан бири гўдак йиғисини эшитиб қолади. Чақалоқнинг ёнидан озроқ маблағ, сут кукуни ва туғилган санаси ёзилган хат топилади. Болалар уйига топширилган қизалоқнинг тақдири бир йилдан сўнг тубдан ўзгаради: уни Нидерландиядан келган меҳрибон жуфтлик асраб олиб, Европага олиб кетади.

Хун Янли Нидерландияда тўкис меҳр ва ғамхўрлик оғушида вояга етди. У нафақат юқори маълумот олди, балки илм-фан чўққиларини забт этиб, докторлик диссертациясини ҳам муваффақиятли ҳимоя қилди. Бироқ қалбининг бир четидаги "мен кимман?" деган савол уни тинч қўймасди.

28 йиллик айрилиққа нуқта қўйилди

Кўнгиллилар ёрдамида ДНК намунасини топширган Хун Янли, ниҳоят, ўз биологик ота-онасини топди. 14 март куни у туғилган қишлоғига ташриф буюрди. Уни ҳақиқий байрам — мушакбозлик ва тантаналар билан кутиб олишди.

• Она изтироби: Қизнинг онаси қайнотасини бу қилмиши учун бир умр кечирмаганини ва у ўлгунига қадар гаплашмаганини сўзлаб берди.

• Ота совғаси: Йиллар давомида айбдорлик ҳисси билан яшаган ота, қизига олтин билагузук ва нафис нефрит тақинчоқ совға қилиб, ўз соғинчини ифода этди.

"Бир оила — бир фарзанд" сиёсатининг аччиқ меваси

Хитойда 1980-1990-йилларда юритилган демографик чекловлар минглаб қизларнинг тақдирини остин-устун қилиб юборган эди. Ўғил болани авлод давомчиси ва қариликдаги суянчиқ деб билишган анъанавий қарашлар кўплаб оилаларни ўз жигарбандларидан воз кечишга мажбур қилган. Хун Янлининг воқеаси — ана шу даврнинг минглаб акс-садоларидан биридир.

Эндиликда хитойлик ота-она ёзда Нидерландияга сафар қилиб, қизини тарбиялаб, вояга етказган хорижлик жуфтликка ўз миннатдорчилигини билдирмоқчи.

Азиз мухлислар, сизнингча, инсон ўз илдизларини қанча вақт ўтса ҳам излаши керакми? Фарзанд жинсига қараб ажрим қилиш инсонийликка тўғри келадими?