Ўзбекистонда энг кўп ишлаб чиқарилган автомобиль модели маълум бўлди
2026 йилнинг январь–февраль ойларида Ўзбекистонда жами 64 221 дона енгил автомобиль ишлаб чиқарилди. Миллий статистика қўмитаси маълумотларига кўра, бу кўрсаткич ўтган йилнинг мос даврига нисбатан қарийб 6,9 минг донага ошган.
Ишлаб чиқариш таркибида энг катта улуш “Cobalt” русумига тўғри келмоқда. Мазкур моделдан 23 216 дона ишлаб чиқарилиб, умумий ҳажмнинг қарийб учдан бир қисмини эгаллаган ва бозордаги етакчилик мавқеини сақлаб қолган.
Кейинги ўринларда эса “Damas” (12 301 дона), “Tracker” (6 210 дона) ҳамда “Onix” (5 215 дона) моделлари қайд этилди. Бошқа сегментларда эса турли брендлар ўз улушига эга бўлиб, ишлаб чиқариш ҳажми нисбатан камроқни ташкил этган.
Шунингдек, “КИА” русумида 4 039 дона автомобиль ишлаб чиқарилган бўлса, электромобиллар сегментида “BYD” 3 165 дона натижа кўрсатган. Бундан ташқари, “Haval” 2 405 дона, “Chery” эса 1 290 дона автомобиль ишлаб чиқаргани маълум қилинди.
Алоҳида қайд этилишича, махсус турдаги енгил автомобиллар ишлаб чиқариш ҳажми 6 380 донани ташкил этган.