Жамоат жойида ярим яланғоч юрган эркак қамалди
Кеча, 1 апрель куни ижтимоий тармоқларда номаълум шахс Тошкент шаҳри Чилонзор туманида жамиятда юриш-туриш қоидаларини бузиб, ярим яланғоч юргани акс этган видео тарқалди ва турли муҳокамаларга сабаб бўлди. Бу ҳуқуқбузарликни содир этган шахс 10 суткага қамалди.
Ҳужжатда қайд этилишича, жорий йилнинг 22 март куни 1998 йилда туғилган Ш.О. Тошкент шаҳри Чилонзор туманидаги “Magic City” кўнгилочар жойида ярим яланғоч ҳолда видеолавҳа олиб, оммани ўз ҳаракатлари билан жалб қилган. Шунингдек, у атрофдагилар орасида турли ҳаракатлар қилиб, жамоат тартибини бузган ва майда безорилик содир этган. Бундан ташқари, Ш.О. ИИО ходимларининг қонуний талабларини бажармасдан ҳуқуқбузарликни давом эттирган.
Кеча, 1 апрель куни Жиноят ишлари бўйича Чилонзор туман судида мазкур иш кўриб чиқилган. Суд мажлисида Ш.О. айбини тан олиб, қилган ҳаракатларида маъмурий ҳуқуқбузарлик аломатлари йўқлигини, шундай оғир оқибатларга олиб келиши мумкинлигини тушунмаганини, қилмишидан пушаймон эканлигини айтди ва ўзига нисбатан енгиллик қўлланишини сўраган.
Суд Ш.О.ни Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (Ички ишлар органи ходимининг қонуний талабларини бажармаслик) 1-қисмида назарда тутилган ҳуқуқбузарликни содир этган деб топди.
Шундай қилиб, ижтимоий тармоқларда тарқалган видео нафақат қизиқиш уйғотди, балки қонун талаблари ҳам сезиларли эканини яна бир бор кўрсатди.