Пенсиягә өләшәсе акчаларны урлаган өчен, хат ташучы хатын улын буып үтергән
Красноярск краенда яшәүче хатын 22 яшьлек улын буып үтергән. Әни кеше хат ташучы булып эшли. Аның улы кешеләргә өләшәсе пенсия акчаларын урлый. Бу турыда РЕН ТВ хәбәр итте.
22 яшьлек егет, хәмер сатып алу өчен, әнисеннән 40 мең сум акчаны урлый. Әлеге акчаны хат ташучы хатын пенсионерларга өләшергә тиеш була.
Край буенча Тикшерү идарәсе белешмәсе буенча, 42 яшьлек хатын 20 гыйнварга каршы төнендә улының йокыга киткәнен көтеп тора. Аннары әни кеше улының башына пакет каплый һәм буып үтерә.
Шуннан соң әни кеше улының мәетен күршедә кеше яшәми торган йортка алып керә һәм идән астына ыргыта. 4 көн узгач, ул кызына шалтырата һәм абыйсының үлүен хәбәр итә.
Тикшерү комитеты белешмәсе буенча, әни кеше улын хәмер эчеп йөргән өчен ачудан үтергән.
Урынга килгән полиция хезмәткәрләре күрше йортта идән астында ир-ат мәетен тапкан. Үтерүче хатынны тоткарлаганнар. «Үтерү» маддәсе буенча җинаять эшен тикшерү бара, диелә хәбәрдә.