«Айардыын» сарсыардааҥҥы чэй
«Айар» кыһа ааптары ааҕаччытын кытары истиҥ кэпсэтиилээх көрсүһүүнү тэрийэргэ анаан «“Айардыын” сарсыардааҥы чэй» бырайыагы айбыта. Сүпсүлгэннээх олохпут үгэнигэр сарсыарда чэй иһэн, наҕылыйан аахпыт, ааҕыаххын баҕарар айымньын туһунан суруйааччылыын атах тэпсэн олорон кэпсэтэргэ, ааҕааччы биир араҥатын хабар сыаллаах толкуйдаммыта.
Балаҕан ыйын 20 күнүгэр «Тото-хана» эрэстэрээҥҥэ бэйэтин ааҕааччытын «Три кувшина» сэһэн ааптара Сардана Сивцева-Саная сарсыардааҥҥы чэйгэ ыҥырда. Дьиҥ олохтон суруллубут сэһэн ааҕааччыта киэҥэ бу көрсүһүү көрдөрдө: салайааччылар, суруналыыстар, учуонайдар, бүддьүөт үлэһиттэрэ, бииргэ үөрэммит үөлээннээхтэрэ. Ол сиэринэн кэпсэтии дириҥ хорутуулаах ааста. Айымньыга төһө да Аҕа дойду Улуу сэриитин кэмэ ойууламмытын иһин күн бүгүн тоҕоостоох тиэмэлэри көтөҕөр – интернационализм, эйэ, киһиэхэ үтүө сыһыан, бэл диэтэр аныгы кэмҥэ бухатыырдар бааллар дуо диэҥҥэ тиийэ.
Саная санаатын суругунан эрэ буолбакка уруһуйунан эмиэ тиэрдэр талааннааҕын биллибит. Бастакы кинигэтигэр эрэдээктэр Туйаара Федорова көҕүлээһининэн аан маҥнайгынан «Айар» кинигэлэригэр видеолаах сыһыарыы туттуллубута. Сарсыардааҥҥы чэй ыытааччыта, биллэр суруйааччы, эрэдээктэр Евдокия Иринцеева-Огдо этэринэн, бу эрэдээктэр ураты көрүүтэ, кыһамньылаах сыһыана, ааптары кытары ыкса үлэтин түмүгэ буолар. Саная бэйэтин уруһуйа киирбитэ – эмиэ бэлиэр түгэн.
Маннык сыһыарыылаах кинигэлэр кэнники кэмҥэ өссө тупсан, кыайа туттуллан тахсаллара үксээтэ. Ол эрэн, бастакы аата бастакы. Балаҕан ыйын 15-17 күннэригэр Новосибирскай куоракка буолбут эрэгийиэннэр икки ардыларыгар ыытыллыбыт «Сыл бастыҥ кинигэтэ: Сибирь-Евразия» күрэххэ интэриниэт куоластааһын түмүгүнэн «Три кувшина» «Сыл бастыҥ прозата» номинацияҕа анал бирииһи ылла. Маны таһынан, күрэх тэрийээччилэрэ «Айар» кыһа кинигэлэригэр эбии сыһыарыыны кыайа туталлар диэн бэлиэтээбиттэр. Үрдүк сыанабыл эһиги, ааҕааччыларбыт, көмөҕүтүнэн ылыллар. Түгэни туһанан аныгы технологияны туһаныыга суолу арыйбыт ааптарбытыгар Сардана Сивцева-Санаяҕа махталбытын тиэрдэбит! Айар аартыгын аһаҕас буоллун, суруйар бөрүөҥ ааҕааччыны абылыыр ньымата сытыырхайан истин!
Сообщение «Айардыын» сарсыардааҥҥы чэй появились сначала на Сетевое издание SAKHALIFE.RU.