Әнвәр Нургалиев: «Кычкырасы, елыйсы килә»
Уфада яшәп иҗат итүче җырчы Әнвәр Нургалиевның әти-әнисенең вафатын бик авыр кичерүе хакында күп тапкырлар сөйләгәне бар. Аның сүзләренчә, әлеге кайгылардан ул әле дә айнып җитә алмый. Бу көннәрдә җырчыга, әнисе белән бәйле барлык хатирәләрне яңартырлык истәлекле видеоролик килеп төшкән. Анда Әнвәр Нургалиевның әнисе белән төшкән фотосын ясалма фәһем ярдәмендә җанландырганнар.
«Ясалма интеллект ясаган видеоны миңа җибәрделәр. Монда безнең әни белән соңгы бәхетле көннәребез. 5нче апрельдә ул вафат булды. Барысы да үзгәрде, бары тик кычкырасы һәм елыйсы килә. Әни җитми, аның: "Улым кайчан кайтасын инде? Нигә шалтыратмыйсың?» – дигән сүзләре җитми. Кадерләгез һәм саклагыз ата-аналарыгызны », - дип уртаклашты кичерешләре белән Әнвәр Нургалиев шәхси блогында.
Әнвәр Нургалиевның әнисенең үлеме бик үкенечле булды. Аны коронавирустан вафат булды, дип фаразлап, махсус табутта җирләделәр. «Мин хәер дә тарата алмадым, кеше янына килеп, әнинең каберенә балчык та ата алмадым. Гәрчә шушындый махсус табутта булган мәет токсиннар чыгармый, кеше аңлап бетермәс дип, махсус бер кеше янына да бармадым», – дип сөйләгән иде җырчы «Интертат»ка, бик борчылып.