Фирдүс Тямаев: «Минем турында алай язмагыз»
Кичә Интернет киңлекләрендә Татарстанның атказанган артисты Фирдүс Тямаев турында күңелсез хәбәрләр таралды. Җырчыда онкология табылган. Бүген исә ул үзенең хәле турында видео яздырган.
Сәлам, дуслар. Бүген көне буе миңа туганнар, дуслар телефоннан шалтырата, хәлләрне беләләр. Интернет дөньясында хатлар язалар. Анда минем турында бик күп хәбәр язганнар. Хастаханәдә ята, дип язганнар, инде үтереп тә, җирләп тә куйганнар. Минем белән барысы да әйбәт.
Кеше чирләмичә тормый. Онкология инде ике кешенең берсендә бар. Аның усалы һәм җиңел үтә торганы бар. Аллаһка шөкер, миндә җиңел үтә торганы булып чыкты. Бүгенге көндә дәвалану алам, барысы да әйбәт. Кайгыртканыгыз өчен зур рәхмәт. Үзегезне саклагыз, елына бер тапкыр булса да тикшеренегез! Исәнлек беренче урында тора. Әле җырлыйсы җырлар калды, күрешәсе көннәр алда. Исән-сау булыгыз, үзегезне саклагыз. Мин сезне «просто люблю». Бирешмәбез, Аллаһ теләсә! Чын күңелдән рәхмәт сезгә! – дип сөйли ул видеода.
Җырчы: «Минем турында алай язмагыз. Минем белән барысы да әйбәт», – дип язып та куйган.