Фирдүс Тямаев махсус операция зонасыннан кайтып килә: «Анда күздән яшь кенә ага...»
Татарстанның атказанган артисты Фирдүс Тямаев махсус операция зонасында 5 көн булып, кайтыр юлга чыккан.
«Дуслар, Аллаһка шөкер, чикне уздык. Теге якка чыккач, 1500 чакрым бардык. Һәрбер егеткә туктап, гуманитар ярдәмне кулларына тапшырдык. Алгы сызыктагы егетләр янына да бардык. Алар белән блиндажда – җир астында бергә йокладык, гармуннарда уйнадык, елаштык. Тизрәк бу хәлләр тәмамлансын иде. Гуманитар ярдәм җибәргән барчагызга рәхмәт.
Теге квадроциклны барыбер алдым бит мин, амәнәтемне үтәдем. Андагы хис-кичерешләрне аңалатып булмый, дуслар. Анда күздән яшь кенә ага», – дип фикерләре белән бүлешә ул социаль челтәрдәге сәхифәсендә.
Фирдүс Тямаевның махсус хәрби операция зонасына гуманитар ярдәм илтергә җыенуы хакында «Интертат» язган иде.
«Нурлаттан 3 фура һәм 2 микроавтобус бара. Менә монда минем якын дусларым шәхси бүләкләр әзерләгән. Алар казылык, сыр, казлар, сосискалар китереп бирде, әле егетләр тагын алып киләчәк. Акча җибәрүче дусларым да бар. Квадроцикл алып барырбыз дигән идек, азрак акча җитеп бетмәде, икенче юлы алып барырбыз инде», – дип сөйләгән иде артист.