Па хон пелакн рут муваӆ ӆавӆам хатнэху
Там ӆапатан Россия ӆоватн «Рут мувев ӆаваӆты ёх» емаң хатӆ постатыя питӆа. Щи вер ураңн там хатӆ ма па хон пелакн рут муваӆ ӆавӆам хатнэху Василий Васильевич Хандыбин эӆты ханштыя вутщиӆам.
Ӆув Ас хаӆты тыӆащ 13-мет хатаӆн 1967-мет таӆн Тэк куртан Суматвош районан сэма питас. Ащеӆ иса ох ӆуңатты тахайн бухгалтер щирн XIX партсъезд нэмпи колхосн ус, аңкеӆ — нийӆмет классаң ашкуӆа-интернатн пормасат шавиты нэңа рупитас. Юхат, ванта, ӆапкайн пормасат па ӆэтотат тыныты нэ щирн рупата ӆувеӆа мощатас.
Ӆый семьяеӆн ар няврэм энмас: хуӆам эви па хуӆам пох. Василий 1975-мет таӆ вуш эӆты па иса 1983-мет таӆ вуш унты нийӆмет классаң ашкуӆайн Тэк куртан утаӆтыйс. Муй щирн еӆӆы уӆапсайӆ тыйс, мин ияха щи потрэмасман.
– Василий Васильевич, муй хорасап тахайн наң еӆӆы утаӆтатыя питсан?
– Ашкуӆа юпийн ма Нижневартовск вошаң профессионально-технической училищая утаӆтатыя мантсам. Щита «контрольно-измерительные приборы па автоматика» щирн мув иӆпи тащ каншты рупата верата утаӆтысам. Щи верэм етшаптамемн, диплом нэпек ёша пайтсам па рупиттыя питсам. Имоӆтыйн, па ищи таӆ сусн, Советской армияя мувем ӆаваӆтыя вохсайм.
– Муйсыр тахаян наң щи порайн служиттыя питсан па мата ун вошатн усан?
– Армияя манмев кутн муң арсыр тахаятн усув, хота арпелак эӆты кущаятн вантсаюв па артаӆасаюв. Юхат веӆщи Вышний Волочок воша тусаюв. Щита тохӆаң хопат ӆатты тахайн служитты щирн хут тыӆащ сыс яма утаӆтысаюв.
Ас потты тыӆащ ӆапатмет хатӆ 1986-мет таӆ вуш эӆты па Ас нопатты тыӆащ ӆапатмет хатӆ 1987-мет таӆ вуш унты щимащ утаӆтаты тахайн ма служитсам.
– Василий Васильевич, муйсыр воша па мува еӆӆы мувен ӆаваӆтыя китсайн?
– Утаӆтаты тахаев етшаптамев юпийн па хон пелка, Польша мува, служитты китсаюв. Мет оӆаңан тохӆаң хопн Кшива нэмпи воша тусаюв, юхат почта таӆты машинайн Бжек воша ёхатсув. Щи тахайн Советской Союз мув Герой Иван Константинович Боронин нэм тайм эскадрилья хоща питсам. Старший механик щирн усам, ямкем ар тохӆаң хоп кашаң хатӆ сыс вантман тайсам. Ванта, муң рупатаев такӆы муй хорасап тохӆаң хоп нох пурӆатыя верытас.
Щиканща Ас нопатты тыӆащн 1988-мет таӆн аңкем шеңк мушиттыя керӆас па ма ёхи куща ёхӆамн отпуска эсӆысайм. Ёӆн еша усам па еӆӆы служиттыя ёхатсам. Армияйн, ванта, мет шопаң оӆаң тыӆщатн щикем самем ӆыпийн рут мувема таӆсайм, кушкепа ӆуӆн и пуш ӆувеӆ ванттыя па рутӆам шияӆаты.
Туп хун мувем ӆаваӆты таӆат па тыӆщат ванаматыя питсат, щи порайн муң эскадрилья тахаева яӆап ай ёх служиттыя тусайт. Ӆый кутэӆн и рущ няврэм Суматвош эӆты ус. Ӆув муң кущаев машинайн тутлисӆы. Мин, матты ки кат яйңан-апщеңан усман. Ияха рут мувев нумаӆмаӆув, хуӆ па вой веӆпасат эӆты потрэмиӆман. Щиты айӆтыена служитты верӆам сохнаптасӆам.
Рут муваӆ ӆаваӆты верат етшаптамаӆ кутн, 1988-мет таӆн. Хор: Владимир Енов.
– Армия эӆты ёхатменан, муйсыр тахайн наңена рупата мощатсан?
– Ёӆн еша щутщасам па Тэк куртаң почта хотн рупиттыя питсам. Ма мет оӆаңан Суматвош тохӆаң хопат ӆатты тахая вохиӆысайм, туп щий ма ант кашащсам. Щи порайн Тэк почтаев хоща туп хуӆам телефон рупитас. Ма па 40-кем номер яӆпа туса ӆэщатсам.
– Куртаң почта хотн, аӆпа, ям хув кут усан па рупитсан?
– Анта. Ма 1991-мет таӆн па яӆап вер манэма каншсам. Ямсыева оша версэм, хоты Кондинской районан мув иӆпи тащ и таха эӆты па тахая карты турат хуват эсаӆты таха верман уӆ. Ма щий яңхсам, кущайт пиӆн ияха уйтантысам па потрэмасам, па оператор щирн рупитты вусайм. Щи порайн, ванта, кат тахая карты турат хуватн мувшув па мувъйиңк иса еӆӆы китса, щит: «Уренгой — Помары — Ужгород» па «Сургут — Полоцк». Имоӆтыйн ащем кашийн ёхатса. Ванта, ӆув иса манэм ёхи вохсаӆы. Щаӆта щи рупатаем хайсам па ёхи щи ёхатсам. Тата телевышка хоща электромонтёр щира 1995-мет таӆн рупитсам па сокращение онтасн рупатайӆы хащсам. Щи юпийн куртаң куща хотэвн тутъюхат эватты хоята усам. Ёхи хащам порайн «Бюро судебно-медицинской экспертизы» ӆэщатты тахайн Тэк куртэмн щи рупитӆам.
Тэк куртые. Хор: Людмила Гурьева.
Владимир Енов ханшам потар