ChatGPT-ն ստացել է բարելավված պատկերների գեներատոր՝ Sora-ի հիմքով
OpenAI-ը թարմացրել է իր Sora վիդեո գեներատորը եւ այն ինտեգրել ChatGPT-ում:
Չատբոտի օգտատերերն արդեն կարող են ստեղծել ավելի որակյալ պատկերներ ու խմբագրել դրանք, իսկ ապագայում կկարողանան աշխատել նաեւ տեսանյութերի հետ։
Նոր գործառույթը հասանելի է ChatGPT Plus, Pro, Team եւ անվճար բաժանորդագրություններով: Անվճար օգտագործման սահմանաչափը նույնն է, ինչ DALL-E 3-ով պատկերների ստեղծման դեպքում՝ օրական երեքը: Այնուամենայնիվ, այն կարող է պարբերաբար փոխվել՝ կախված պահանջարկից:
Sora-ի նոր տարբերակի համար թիմն օգտագործել է GPT-4o մոդելը, որը կարող է ստեղծել ցանկացած տեսակի տվյալ՝ տեքստ, պատկերներ, աուդիո եւ վիդեո: Ընկերությունը հայտնել է, որ համակարգն այժմ ի վիճակի է առանց սխալների ճիշտ կապել ատրիբուտները 15-20 օբյեկտի համար, ինչը զգալիորեն մեծացնում է դրա ճշգրտությունն ու հուսալիությունը:
Նոր սերունդը պատկերներ է ստեղծում հաջորդաբար՝ ձախից աջ եւ վերեւից ներքեւ: Սա տարբերվում է դիֆուզիոն մոդելի մեթոդից, որն օգտագործվում է պատկերի գեներատորների մեծ մասի կողմից, ներառյալ DALL-E-ն, որտեղ ամբողջ պատկերը ստեղծվում է միանգամից: Այս պատճառով համակարգը գեներացնելու համար ավելի երկար է տեւում, քան նախկինում: Աշխատանքի որակը, սակայն, փոխհատուցում է հավելյալ վայրկյանները, նշել է OpenAI-ը։
Ընկերությունը նաեւ ավելացրել է, որ գործիքը չի կարող օգտագործվել ջրանիշերը հեռացնելու, էրոտիկ խորը ֆեյքեր ստեղծելու կամ հայտնի մարդկանց դեմքերով վիրավորական պատկերներ ստեղծելու համար։
Միեւնույն ժամանակ, թարմացվել է Sora կայքը. այժմ կարող եք ստեղծել ոչ միայն տեսանյութեր, այլեւ՝ ստատիկ պատկերներ։