Ринат Рахматуллинга – 55!: Яшь хатыны белән дуэт, бүләккә тонометр, «утыру» турында мәзәк

Концертка барыр алдыннан, билетлар сатыла торган сайтка кереп, буш урыннар калганмы икән дип кызыксындым. Гаҗәп, тик җәйнең иң уртасында, кояш кыздырганда да барлык билетлар сатылып беткән иде.

Сәгать 7 тулды. Концерт башланмый да башланмый, залда буш урыннар да күренгәли. Үземнең «билетсыз» күңелемдә «бу концертны утырып карармын» дигән өмет чаткысы һаман да дөрли… Спойлер: зал шыгрым тулды, 4 сәгатькә якын барган концертны мин басып карадым.

Бәйрәм, 10 минутка соңарып булса да, ниһаять, башланып китте, тамашачылар, кулларына берничә шешә су тотып, урыннарына кереп утырдылар. Залда бик бөркү иде, шул вакытта мин ишек янында басып торуымның бер уңай ягы – монда бераз булса да һава булуын аңлап, куанып куйдым.

Концерт дәвамында сәхнәдә экраннан Ринат Рахматуллинның балалар бакчасында матрос булып биюеннән бүгенге көненә кадәрге тормышы яктыртылган видео күрсәтелде. Бәйрәмдәге иң беренче номер да матрослар биюе иде. Биючеләр арасында Ринат Рахматуллинны да күргәч, шаккаттым. 50 яшьтә тормыш башлана гына, дигәннәрен ишеткәнем булды, ә 55тә аның, гомумән, гөрләгәнен белми идем. Ринат абый төркемендәге биючеләреннән бер дә калышмый, «ничава» гына селкенде үзе.

«Еллар үтте, тик Ләйлә онытылмый»

– Исәнме, тамашачым! Менә бар да шул икән: сез дә һаман шул икән, бер дә үзгәрмәгәнсез, мин дә һаман шул Ринат Рахматуллин. Экстремальный, рискованный Ринат Рахматуллин инде мин. Дуслар, кем инде җәйнең кыл уртасында, Казанның зур залында концерт куя?! Только Рахматуллин так может , – дип башлап җибәрде сүзен юбиляр, «Бар да һаман шул икән» җырын башкарганнан соң.

Аннары үзенең балалар бакчасындагы беренче мәхәббәте Ләйлә турында сөйләп китте. «Еллар үтте, тик Ләйлә онытылмый. Беренче мәхәббәт ул беркайчан да онытылмый», – диде ул һәм Ләйләгә багышлап җыр башкарды.

Бу җырны тыңлагач, яшь хатыны Динара ирен көнләшмәде микән, дип кенә уйлап куйдым.

Ринат Рахматуллин концертында легендар «Картайма әле, әнкәй», «Тормыш китабы», «Тукта, яңгыр» җырлары белән беррәттән тамашачыларга өр-яңа җырларын да тәкъдим итте. «Картайма әле, әнкәй» җырын башкарыр алдыннан, җырчы үзенең мәрхүмә әнисе турында искә төшереп китте:

– Әнигә күпме хәсрәт-борчылулар китергәнемне үзем һәм әни генә белә. Мин күпме авырлыклар, аварияләр кичердем, аска да тәгәрәдем һәм янәдән өскә мендем. Мин әниемә бик рәхмәтле, бары тик әнинең фәрештәләре, догалары мине бу дөньяда саклый, яшәтә. Тагын бер кат әниемә мең-мең рәхмәтләремне әйтәм, «теге» дөньядан да миңа догаларын шулай биреп торсын иде, ә мин аңа дога итеп шушы җырымны башкарам, – диде ул.

«...миңа кияүгә чыкканда, аңа 25 яшь иде»

Җырчы, әлбәттә, яшь хатыны турында да әйтми калмады.

– Ул һәр минут, секунд саен минем белән. Дөньям ишелеп, аска тәгәрәгәндә, ул минем тормышымда барлыкка килде. Бу – минем тормыш иптәшем. Үзе яшь кенә, миңа кияүгә чыкканда аңа 25 яшь иде, миңа бүген 55. Шушы бала миңа дөрес юл күрсәтеп, шушы сәхнәгә менгезде. Мин аның алдында баш иям, мин аңа бик рәхмәтлемен, – диде ул һәм, тормыш иптәшенә багышлап, «Мәхәббәттә яшик» җырын башкарды.

Үзе «хатыныма багышлап җырлыйм бу җырны» дисә дә, икенче куплетны җырлап, сәхнә артыннан Динара килеп чыкмасынмы! Бик матур дуэт булды бу, зал да гөр килеп алкышлады. Динараның тавышы шундый йомшак, күңелгә май булып ята, нигә алдан да бергә җырламадылар икән, дип уйлап куйдым.

Бу дуэттан соң, сәхнәгә Динараның әти-әнисе һәм нәни улы Камил чыгып, җырчыларга 2 зур кәрзин роза чәчкәләре бүләк иттеләр.

Концертка Ринатның бик күп дуслары һәм танышлары килгән иде. Һәммәсе юбилярга чәчәкләр, бүләкләр алып килгәннәр. Ринат, үз чиратында, һәммәсенә җылы карашын һәм календарьләрен бүләк итте, барысына да зур рәхмәтләрен белдерде.

Бәйрәм концертының сценарий авторы Раил Садриев та Ринатны матур сүзләрсез калдырмады, тамашачыларга да матур шигырен, кызык мәзәкләрен сөйләде.

Афишада «концертта Ринат Рахматуллинның дуслары да булачак» диелгән иде. Чыннан да, сәхнәне бер-бер артлы татар эстрадасының якты «йолдыз»лары – Марат Яруллин, Гөлназ Асаева, Рөстәм Асхадуллин, Рифат Зарипов, Данир Сабиров һәм Искан гөрләттеләр. Алар берсеннән-берсе матур җырлары, шаярулары белән Ринат абыйның гына түгел, барлык тамашачыларның да күңелләрен күрде. Килгән дусларының һәрберсенә Ринат Рахматуллин бүләкләр тапшырды. Ә Марат Яруллин белән «Чакыр гына мине» җырын дуэт итеп үк җырлады.

– Үзбәк булсам да, бүләксез йөрмим мин, чөнки бу – дөрес түгел. Гадәттә, туган көнгә зур, баллы әйбер – торт бүләк итәләр. Минем бүләкне ашап булмый, ләкин ул да зур, һәм кызлар аны «сладкий» дияләр, – диде Данир Сабиров, һәм сәхнәгә яшь рэпер Исканны чакырып чыгарды. Исканның кулында төп бүләк – сыерчык оясы иде.

Шулай ук, Данир Сабиров белән Искан бүләккә Салават абыйның «Туган көн» җырының яңа вариантын бүләк иттеләр.

«Ринат, син утырырсың»

Данир Сабиров кая – кара юмор шунда. Җырчы махсус Ринат Рахматуллин өчен мәзәк тә уйлап килгән булып чыкты. Үземә бик кызык булды, шуңа сезгә дә язып китәм.

«Күз алдыгызга китерегез: Салават абый, Җәвит абый һәм Ринат абый ауга киткәннәр, ди.

Боларның каршыларына болан чыккан.

Җәвит Шакиров: «Җәмәгать, бу – «Кызыл китап»ка кертелгән хайван, тимик аңарга».

Салават Фәтхетдинов: «Хәзер ауда да китап карап йөрибезме. Какая разница, ул кызылмы, яшелме – надо валить».

Ринат Рахматуллин:

«Мин армиядә иң яхшы атучы идем, үзем атам».

Җәвит Шакиров:

«Юк, үзем атам».

Ринат Рахматуллин: «Мин атам».

Салават Фәтхетдинов:

«Егетләр, тынычланыгыз, талашмагыз! Әйдә болай итик: үзем атам, андый-мондый проблема чыкса, Җәвит, син свидетель булып барырсың, алайса син бөтен әйберне Зөлфиягә сөйләп барасың. Ринат, син «утырырсың».

Рифат Зарипов исә аеруча файдалы әйбер бүләк итте.

– Дөнья булгач, төрле хәлләр була. Алай-болай күтәрелеп китсә, йә төшеп китсә... Давление турында мин. Башларың әйләнеп китсә, янәшәңдә яшь хатын, тотып үлчәр, менә сиңа тонометр, – диде һәм бүләген җырчыга тапшырды.

Концерт бик кызык үтте, моңсуланырлык та, күз яше килгәнче көлерлек мизгелләр дә күп булды. Кызу булса да, автобуслар, трамвайлар йөрми башласа да, халык кайтырга ашыкмады. Бәйрәмен Ринат Рахматуллин яңа «Еллар сүтәм, юллар үтәм» җыры белән тәмамлады.