«Զվարթնոց»-ի հին մասնաշենքի էստակադան կապամոնտաժվի
Անահիտ Թարխանյանը նախօրեին լրատվամիջոցներին տեղեկացրել էր, որ Երեւանի քաղաքապետարանը թույլ է տվել ապամոնտաժել «Զվարթնոց»-ի կլոր մասնաշենքը:
Ճարտարապետը նշել էր, որ այս կապակցությամբ ինքը՝ որպես համալիրի հեղինակի ժառանգ, դիմելու է Հայաստանի եւ Արգենտինայի իրավապահ մարմիններին, ինչպես նաեւ կոռուպցիայի դեմ պայքարող միջազգային կառույցներին։
Քաղաքապետարանի տարածած պարզաբանման մեջ ասված է. «Ճարտարապետ Անահիտ Թարխանյանի կողմից զանգվածային լրատվամիջոցներին տրամադրված հայտարարության վերաբերյալ տեղեկացնում ենք, որ ««Արմենիա» Միջազգային օդանավակայաններ» ՓԲԸ-ի կողմից ներկայացված համապատասխան դիմումի եւ հայտի հիման վրա, հիմք ընդունելով ՀՀ կառավարության 2013 թվականի դեկտեմբերի 26-ի ««Զվարթնոց» միջազգային օդանավակայանի կոնցեսիոների կողմից ներկայացված 2013-2017 թվականների մաստեր պլանը հաստատելու մասին» թիվ 1495-Ն որոշման 1-ին կետով հաստատված մաստեր պլանը, նույն որոշման 4-րդ կետով նախատեսված՝ ՀՀ վարչապետի որոշմամբ ստեղծված միջգերատեսչական հանձնաժողովի քննարկումների արդյունքները, ինչպես նաեւ կազմակերպության կողմից ներկայացված՝ ՀՀ օրենդրությամբ նախատեսված այլ անհրաժեշտ փաստաթղթերը, ««Արմենիա» Միջազգային օդանավակայաններ» ՓԲԸ-ին 24.12.2015 թվականին տրվել է նախագծման թույլտվություն (ճարտարապետահատակագծային առաջադրանք), որով ընկերությունը պետք է իրականացնի «Զվարթնոց» միջազգային օդանավակայանի ընդլայնման եւ հին համալիրի վերակառուցման աշխատանքների նախագծային փաստաթղթերի մշակում:
Միաժամանակ, հաշվի առնելով «Սեյսմիկ պաշտպանության արեւմտյան ծառայություն» ՊՈԱԿ-ի կողմից կազմված «Զվարթնոց» միջազգային օդանավակայանի թիվ 1 համալիրի կառույցների տեխնիկական վիճակի եւ սեյսմիկ խոցելիության գնահատման վերաբերյալ տրված հաշվետվությունը, ««Արմենիա» Միջազգային օդանավակայաններ» ՓԲԸ-ին 24.12.2015 թվականին տրվել է հին համալիրի օղակաձեւ վթարային էստակադայի ապամոնտաժման թիվ 01/18-Ե-1157-82 թույլտվությունը»:
Խնդրի առնչությամբ այսօր Հանրային խորհրդում տեղի է ունեցել աշխատանքային խորհրդակցություն: Ներկաները մտահոգություն են հայտնել հարցի վերաբերյալ` նշելով, որ կան չքննարկված տարբերակներ շենքի ամբողջական պահպանման առումով:
ՀԽ նախագահ Վազգեն Մանուկյանը հանձնարարել է առաջիկա օրերին Հանրային խորհրդում կազմակերպել լայն քննարկում` ներգրավելով բոլոր շահագրգիռ կողմերին եւ քննարկել կոնցեսիոների կողմից ներկայացված նոր նախագիծը, փորձել գտնել ընդունելի լուծումներ բոլոր կողմերի համար: