ՀՀ-ն Ամստերդամում մասնակցել է Wine Professional 2016 ցուցահանդեսին
Հայաստանի զարգացման հիմնադրամը՝ տեղական 5 գինեգործական ընկերությունների հետ համատեղ, Հայաստանն առաջին անգամ ներկայացրել է Նիդեռլանդների մայրաքաղաք Ամստերդամում հունվարի 11-13-ը անցկացվող Wine Professional 2016 գինու միջազգային մասնագիտացված ցուցահանդեսին։
Ցուցահանդեսի շրջանակում տեղի է ունեցել նաեւ հայկական գինիների համտես-շնորհանդես՝ մասնակից ընկերությունների կողմից: Հայաստանի զարգացման հիմնադրամում նշել են, որ Հայաստանի տաղավարը եւ ներկայացված շնորհանդեսները մեծ ուշադրության են արժանացել:
Ընդհանուր առմամբ, ցուցահանդեսին մասնակցել է ավելի քան 100 ընկերություն եւ 12000 այցելու:
Wine Professional 2016-ի պաշտոնական բացման պատիվը վերապահվել է Հայաստանին, որի անունից հունվարի 10-ին բացման խոսքով հանդես է եկել Նիդեռլանդներում ՀՀ արտակարգ եւ լիազոր դեսպան Ձյունիկ Աղաջանյանը:
Ցուցահանդեսի տնօրեն Յան Սեբաստիան Վան Լիսումն էլ բացման խոսքում ներկայացրել է հայկական գինեգործությունը, նրա լավագույն ավանդույթները, անցյալը եւ զարգացման միտումները։
Ի դեպ, Յան Սեբաստիան Վան Լիսումը եվրոպացի փորձագետների հետ 2015թ. հոկտեմբերին այցելել էր Հայաստան եւ ծանոթացել գինեգործության ավանդույթներին: