Музыкант Артур Mauzer Гарәп Әмирлекләрендәге хәлләр турында сөйләде

Саксофончы һәм эшкуар Артур Гыйниятуллин (Arthur Mauzer) «Татар-информ» агентлыгына Якын Көнчыгыштагы кискенләшкән вазгыять һәм аның Берләшкән Гарәп Әмирлекләрендәге тормышка йогынтысы турында сөйләде. Артур сүзләренчә, Әмирлекләрне күпләр куркынычсызлык үрнәге дип кабул итсә дә, соңгы вакыйгалар инвесторларны куркытырга һәм ил икътисадына тискәре йогынты ясарга мөмкин.

Исегезгә төшерәбез, узган ялларда Израиль һәм АКШ Иранга каршы уртак хәрби операция башлады. Җавап чарасы буларак, Иран Израильгә һәм АКШның Якын Көнчыгыш илләрендәге – Иордания, Катар, Гыйрак, Бәхрейн, Күвәйт, Берләшкән Гарәп Әмирлекләре һәм Согуд Гарәбстаны территориясендә урнашкан хәрби базаларына һөҗүм итте.

Артур Гыйниятуллин хәзерге вакытта гаиләсе белән Татарстанда, алар Чаллыда төпләнгәннәр, чөнки биредә барлык туганнары, якыннары һәм бизнеслары урнашкан. «Әмирлекләрдә кышны гына уздырабыз, әмма Рамазан аенда һәрвакыт өйдә булабыз. Чөнки Чаллыда өч хәләл кафебыз бар, анда ифтарлар, хәйрия чаралары оештырабыз, бизнесыбызны контрольдә тотабыз», – дип сөйләде ул.

Музыкант билгеләп үткәнчә, хәзерге вакытта Әмирлекләрдә хәлләр чагыштырмача тыныч булса да, күпләр вакытлыча күрше илләргә китүне өстен күрә.

«Әмирлекләрдә дусларыбыз, туганнарыбыз күп. Күпләр вакытлыча Оманга яки Согуд Гарәбстанына китәргә карар кылды. Оманга – очып китү өчен, чөнки анда һава юллары ачык, ә Согуд Гарәбстанына – мөселманнар өчен изге һәм кагылгысыз урыннар булганга баралар. Фаразларларга кыен, вазгыять буенча карыйбыз. Иран Америка хәрби базалары урнашкан гарәп илләренә һөҗүм ясады. Күрәсең, бу Иран тарафыннан башка гарәп илләренә АКШ һәм Израиль белән хезмәттәшлек итмәскә кирәклеге турындагы бер тапкырлы сигнал булды», – дип аңлатты эшкуар.

Аның фикеренчә, Берләшкән Гарәп Әмирлекләренең куркынычсыз ил имиджы бүгенге көндә сорау астында.

«Гадәти тормыш үзгәрде. Барысы өчен дә Әмирлекләр иң куркынычсыз урыннарның берсе иде, әмма бу вакыйгалардан соң күпләр вазгыятькә башкача карый башлады. Илнең җинаятьчелек күзлегеннән куркынычсыз булуы аңлашыла, әмма гомуми хәл яхшы түгел. Хәзерге вакытта Берләшкән Гарәп Әмирлекләр икътисады элеккеге БДБ (СНГ – иск. «Татар-информ») илләреннән килгән экспатлар һәм эмигрантлар хисабына күтәрелә иде, алар бизнес һәм күчемсез милеккә акча салалар. Бу көннәрдә булган хәлләр инвесторларны куркытырга һәм икътисадны какшатырга мөмкин. Ничек кенә булмасын, яхшыга өметләнәбез. Дубай – безнең икенче йортыбыз, бу илгә миңа биргән яңа мөмкинлекләре өчен рәхмәтлемен. Бу илне яратам һәм хөрмәт итәм», – диде Артур Гыйниятуллин.