Көчле кардан соң – кискен суыту: Татарстанда февральдә һава торышыннан нәрсә көтәргә

Рекордлы кар яуганнан соң, Татарстан аномаль суыкларга әзерләнә. Шул ук вакытта, суык озакка бармас – шимбә көнне үк синоптиклар яңа көчле явым-төшемнәр дулкыны көтә. Февраль аенда һава торышы нинди булачак?

«Кристин» Татарстанда һава торышын бозды

Илнең берничә төбәген колачлап узган көчле циклоны нәтиҗәләре белән Татарстанда әле дә көрәшәләр.

«Якшәмбедән төбәктә һава торышын Европа метеорологлары «Кристин» дип атаган яңа давыл боза башлады. Моңа кадәр ул Европа буенча үтте. Португалиядә генә дә стихия аркасында ким дигәндә биш кеше һәлак булды, йөзләгән мең кеше утсыз калды. Циклон су басулар, ишелүләр китереп чыгарды, көчле җил күп кенә биналарга зыян китерде», – дип хәбәр итте социаль челтәрләрдә «Фобос» үзәгенең әйдәп баручы белгече Евгений Тишковец.

Аның сүзләренчә, кар туктаганнан соң, температура шактый төшәчәк. Үзәк Россиядә җомга көнне азрак кар көтелә.

«2016 елгы гыйнвар рекорды кабатланды»

«Метео» прогнозлау үзәге җитәкчесе Александр Шувалов белдергәнчә, гыйнвар аенда Татарстанның төрле районнарында айлык явым-төшем нормасының 150-180% яуган. Бу күрсәткечкә соңгы бураннар зур өлеш керткән.

«1 февральдә айлык норманың өчтән бер өлеше яуды, кар катламының биеклеге шунда ук 10 сантиметрга артты. Хәзер ул 71 см тәшкил итә – бу шактый зур күрсәткеч. Рекорд булмаса да, аеруча узган еллар белән чагыштырганда, бик зур сан», – дип сөйләде ул.

Гыйнварда Татарстанда барлыгы 76 мм кар яуган, һәм февральнең беренче көнендә тагын 11 мм өстәлгән. «Бу – 2016 елгы гыйнвар рекордының кабатлануы, ул вакытта 87 мм яуган иде. Шуңа күрә, һава торышы катлаулы», – дип билгеләп үтте Шувалов.

Соңгы көчле карны синоптик көньяк циклоны белән дә аңлата.

Фото: © «Татар-информ», Михаил Захаров

«Татарстан циклонның салкын секторында калды»

Дүшәмбе көнне Казанда кар туктады, һәм ул көнне кичкә суыта да башлады. «Бу атна салкын була, төнлә -23-28 градус, көндез -15-20 градус була», – дип өстәде Александр Шувалов. Синоптик сүзләренчә, аз явым-төшемле чираттагы көньяк циклоны көнчыгыштанрак уза һәм Чаллыны гына бераз «эләктерәчәк».. Атмосфера басымы күтәрелүе күзәтелә.

«Күрше төбәкләрдә инде сизелерлек салкын, ул һава Татарстанга килә. Төнге сәгатьләрдә -20-25 градуслы салкыннар булачак», – ди белгеч.

Февраль аномаль салкын булачак

«Метео» үзәге мәгълүматлары буенча, Татарстанда киләсе декадага фараз «артык куанычлы түгел».

«Февраль аенда һава температурасы нормадан түбәнрәк булачак. Айның икенче яртысы, мөгаен, беренчесенә караганда бераз җылырак булыр. Тулаем алганда, февраль климатик нормага караганда 2-3 градуска суыграк булачак», – дип аңлатты Шувалов.

Климатик үлчәүләр буенча февраль аз карлы һәм салкын ай дип санала. ТР Гидрометеоүзәге мәгълүматлары буенча, февральдә уртача айлык һава температурасы нормада -10,7 градус тәшкил итә, явым-төшемнәр уртача 26,1 мм дәрәҗәсендә.

Фото: © «Татар-информ», Михаил Захаров

Чираттагы кар шимбә көнне көтелә

Юл хезмәтләре ишегалларын һәм урамнарны узган «кар апокалипсисы» нәтиҗәләреннән чистартып та өлгермәде, Татарстанга чираттагы явым-төшемнәр дулкыны якынлаша. Синоптиклар киләсе шимбәгә кар фаразлый.

«Шимбә, 7 февральдә, суыклар йомшарачак һәм яңадан кар ява башлаячак. Ял көннәренә чираттагы кар көртләрен көтәбез. 7-8 февральдә 15-20 сантиметр кар өстәлергә тиеш.

Температура -10 градус тирәсе булачак – җиңел, йомшак кар кабарып тора Шуңа күрә кар катламының биеклеге бер метрга якынлашырга мөмкин», – дип билгеләп үтте Александр Шувалов.

«Казанда айлык нормадан 1,5 тапкыр күбрәк кар яуды, Арчада – ике норма»

ТР Гидрометеоүзәге җитәкчесе Феликс Гоголь хәбәр иткәнчә, күпчелек районнарда гыйнварда уртача айлык явым-төшем норманың 128-222% тәшкил иткән.

«Шул ук вакытта ике районда – Бөгелмә һәм Азнакайда – явым-төшемнәр норма тирәсендә, ягъни 30–35 мм булды», – дип өстәде ул.

Гыйнварда кар иң күп Татарстанның көнбатыш районнарында яуды, көнчыгыш һәм үзәк районнарда азрак булды.

«Кар катламының биеклеге соңгы кар яуганнан соң сизелерлек артты һәм 40-68 см тәшкил итте. Кайбыч, Чистай, Мөслим, Азнакай һәм Бөгелмәдә – 25-38 см. Иң биек кар катламы көнбатышта күзәтелә, анда явым-төшемнәр күбрәк иде», – дип басым ясады Феликс Гоголь.

Аның мәгълүматлары буенча, гыйнварда иң күп кар Арчада – 83 мм, Казанда – 69 мм яуган.

«Казанда айлык норманың 151 проценты яуды, әмма шәһәрдә норма бик югары, моны истә тотарга кирәк; Арчада – 200%, ягъни ике норма», – дип ачыклады ТР Гидрометеоүзәге җитәкчесе. Шул ук вакытта республиканың көнбатыш районнарында кар һәркайда 1,5–2 айлык норма күләмендә яуган.

Фото: © «Татар-информ, Владимир Васильев

Якын көннәрдә -30 градуска кадәр суытачак

ТР Гидрометеоүзәге мәгълүматлары буенча:

5 февральдә төпле явым-төшемнәр фаразланмый. Минималь һава температурасы төнлә -23-28 градус, республиканың көнчыгышында аязганда -33 градуска кадәр булачак. Максималь һава температурасы көндез -11-16 градус, көнчыгышта -21 градус булачак.

6 февральдә явым-төшем көтелми. Температура төнлә һәм иртән -14-19 градуска, аязганда -22 градуска кадәр төшәчәк, көндез -9-14 градус көтелә.

7 февральдә кар, урыны белән буран һәм көчле җил фаразлана. Көндез температура -6-11 градуска кадәр күтәреләчәк.

Чыганак: «Татар-информ», Наталья Рыбакова