Да авертайма не далезлі. Хакеісты «Ліды» на выездзе мінімальна саступілі «Брэсту»
Гаспадары ўдала правялі першы перыяд, але «рыцары» ледзь не зачапіліся за ачкі.
Першы хатні матч у новым чэмпіянаце «зубры» пачалі выдатна. Ужо да 13-й хвіліны гаспадары вымусілі суперніка тройчы адправіцца ў боксы для штрафнікоў і адну са спроб розыгрышу большасці скарысталі, калі Кубракоў падставіў клюшку пад кідок Мінгазава. Прыкрай для гасцей гэта шайба выйшла яшчэ і па той прычыне, што меншасць яны атрымалі за вельмі экзатычнае парушэнне – галкіпер зафіксаваў шайбу, але не ўвёў яе ў гульню пры нябытнасці прэсінгу з боку берасцейцаў. Кара рушыла ўслед ужо праз 11 секундаў.
Не паспелі «рыцары» апрытомець, як гарэлі ўжо ў дзве шайбы: перад каўнярамі добра папрацаваў Селівонік, другі раз у матчы які прабіў Шалеснага. Безумоўнай перамогу «Брэста» у першым перыядзе мог зрабіць Коласаў, але не перайграў брамніка ў меншасці пасля выйсця ў нуль.
Калі стартавая траціна цалкам засталася за гаспадарамі, то ў другі «Ліда» схамянулася (спачатку ледзь не арганізаваўшы на роўным месцы шайбу ў сваю браму), і хакей стаў раўнейшым, а працаваць даводзілася не толькі Шалеснаму, але і Гарачэўскіх. На 34-й хвіліне не збаўца і ён – Ідыятулін класна разабраўся з брамнікам у блізкім боі.
Лёс трох ачкоў для «Брэста» падвіс у паветры, і здалося, што гэта наклала адбітак на далейшую плынь матча. «Рыцары», не без дапамогі часцяком якія выдаляліся гульцоў гаспадароў, з часам прыбралі ініцыятыву да рук, няхай па частцы арганізацыі галявых момантаў у іх назіраліся праблемы, у тым ліку ў большасці. А на фінальны штурм банальна не хапіла сіл.
Брэст» не без працы давёў матч до перамогі і паклаў у скарбонку тры ачкі, зацвердзіўшыся ў статусе аднаго з галоўных пераследнікаў «Хіміка». У пятніцу каманда Андрэя Кавалёва прыме юніёрскую зборную, а «Ліда» – «Авіятар».
БРЭСТ – ЛІДА – 2:1 (2:0, 0:1, 0:0)
23 верасня. Брэст, Лёдавы палац. Пачатак – у 19.00. 650 гледачоў.
Суддзі: Н. Разумовіч, А. Гаўрылёнак (абодва – Мінск), К. Шанько (Горадня), А. Лабзоў (Віцебск).
БРЭСТ: Гарачэўскіх; Хараманда – Мінгазаў, Кубракоў – Самсонаў – Сафін; Лямачка – Пятручык, Мусіенка (да) – Карсакаў – Балаболкін; Кафееў – Кірэчка, Жыгалаў – Пампаваны – Валошын; Селівонік – Коласаў – Хадаровіч, Дудко.
ЛІДА: Шалесны; Волес – Сірэнка, Бунец – Міхайлаў – Серакоў (да); Госцеў – Кардашоў, Маршчонак – Зайчык – Бастрыкін; Цітук – Малішэўскі, Буяк – Спяшылаў -– Ідыятулін; Вусік – Мацюшэнка, Будзевіч – Бусько – Апанасевіч.
ШАЙБЫ: 1:0 – Кубракоў (Сафін, Мінгазаў, 12.38 – бол.). 2:0 – Селівонік (Дудко, Кубракоў, 14.19). 2:1 – Ідыятулін (Бусько, Буяк, 33.40).
КІДКІ: 27:27 (13:4, 10:11, 4:12).
ШТРАФ: 10 (Мінгазаў – 4, Балаболкін, Корсакаў, Сафін) – 8 (Волес, Апанасевіч, Шалесны, Сірэнка).
ЛЕПШЫЯ ГУЛЬЦЫ: Хараманда – Ідыятулін.