Drakta til «Guds hand» på auksjon
Diego Maradonas drakt, som han brukte i den ikoniske VM-kampen mot England, skal auksjonerast bort. Det blir ikkje billig.
Den avdøde legenda scora to av dei mest minneverdige måla i fotballhistoria i kvartfinalekampen som Argentina vann 2–1 i 1986.
Først var han oppe med handa i duell med Englands keeper Peter Shilton. Dommaren trudde han brukte hovudet.
– Litt med hovudet til Maradona og litt med Guds hand, svarte Maradona sjølv om målet i etterkant.
Deretter dribla den vesle argentinaren av nesten heile England før han sette ballen forbi Shilton. I 2002 blei scoringa hundreårets mål i ei Fifa-kåring.
Etter kampen var det Englands Steve Hodge som bytte trøye med Maradona. Dei siste 20 årea har drakta vore på fotballmuseum i Manchester. No har han bestemt at tida er inne for å selje drakta.
Auksjonshuset Sotheby's står for salet. Huset sjølv trur trøya kan gå for omkring 4 millionar pund, omkring 45 millionar kroner.
Maradona døydde i november 2020, 60 år gammal.