Гвардиола Эрлинг Холанднинг қачон сафга қайтиши ҳақида маълумот берди
Норвегиялик ҳужумчи Англия Кубоги 1/4 финал босқичида "Борнмут"га қарши ўйинда (2:1) чап тўпиғидан жароҳат олган эди. Унинг жароҳати жиддий экани ва 5-7 ҳафта давомида сафдан чиқиши кутилмоқда.
Гвардиола Холанднинг соғайиш жараёни ҳақида шундай деди:
"Жорий мавсумда юз берган барча жароҳатларни ҳисобга олсак, футболчиларимиз ва Эрлинг учун жуда афсусдаман. У тезроқ соғайиб, жамоага ёрдам беришини тилайман. Шифокорлар менга беш ҳафтадан етти ҳафтагача вақт керак бўлишини айтди. Умид қиламанки, мавсум охиригача ва клублар жаҳон чемпионатига қадар у таркибга қайтади."
Маълумотларга кўра, Холанднинг 15 июндан 13 июлгача АҚШда бўлиб ўтадиган Клублар Жаҳон Чемпионатига қадар тузалиши кутилмоқда. Агар у шифокорлар прогноз қилган муддатда тикланса, мавсумнинг ҳал қилувчи босқичларида "Манчестер Сити"га катта ёрдам бера олиши мумкин.
"Шаҳарликлар" мухлислари эса Холанднинг тезроқ сафга қайтишини сабрсизлик билан кутмоқда.