Гвардиола «Реал»га қарши таркибда катта ўзгариш кутилмаслигини айтди
"Манчестер Сити" бош мураббийи Пеп Гвардиола Чемпионлар лигасидаги навбатдаги ўта муҳим беллашув — "Реал"га қарши учрашув олдидан таркиб сиёсати ҳақида очиқ-ойдин фикр билдирди. Каталониялик мутахассис сўнгги пайтларда айрим ўйинларда тўлиқ таркиб алмаштирилгани учун танқидга учраганини тан олди ва бу гал бундай таваккал қарор қабул қилмаслигини таъкидлади.
Мураббий журналистлар билан мулоқот чоғида шундай деди:
"Йўқ, бу сафар бундай катта ўзгариш бўлмайди. «Байер»га қарши ўйинда тўлиқ таркибни алмаштирганим эсимда. Кейин сизлар — журналистлар мени қаттиқ танқид қилган эдингиз. Очиғи, яна ўша ҳолатни бошдан кечиришни истамайман. Бундай вазиятларда ўзимни ожиз ҳис қилганман".
Гвардиоланинг бу баёнотидан англашилса, у "Реал"га қарши беллашувни максимал даражада жиддий қабул қилмоқда ва асосий ўйинчиларга таяниш ниятида. Учрашув айнан тактик барқарорлик ва тажриба ҳал қилувчи роль ўйнаши мумкин бўлган тўқнашувлардан бири эканини ҳисобга олганда, бу қарор кўпчилик мухлислар томонидан кутилган эди.
"Сити" ва "Реал" ўртасидаги ўйин ҳар доим юқори босим, кучли динамика ва маҳорат тўқнашувига бой бўлади. Бу сафар ҳам шундай бўлиши, Гвардиола эса таркибда барқарорликни сақлаш орқали ғалаба учун энг мақбул вариантни танлаши кутилмоқда.