«Реал» Винисиусни бир шарт билан сотиб юбориши маълум бўлди

Мадриднинг "Реал" жамоасида тўп сураётган бразилиялик ҳужумчи Винисиус Жуниорнинг клубдаги истиқболи ҳанузгача ноаниқлигича қолмоқда. Нуфузли хорижий манбаларга кўра, 25 ёшли футболчи «Қироллик клуби» билан янги шартнома имзолаш масаласида жиддий иккиланишни бошлаган.

Бу ҳолатга асосий сабаб сифатида Винисиуснинг мухлислар муносабатини ҳис қилиб қолгани айтилмоқда. Хусусан, "Севилья"га қарши ўтган баҳсда «Сантьяго Бернабеу»да йиғилган ишқибозлар уни алмаштириш пайтида ҳуштакбозлик билан кузатиб қолишган. Бу эса футболчининг руҳиятига жиддий таъсир қилгани таъкидланмоқда.

Шундан сўнг Винисиус ижтимоий тармоқларда ҳам совуққон ҳаракат қилди: у «Реал» либосидаги суратларини ўчириб, фақат уч нуқта билан чекланди. Бу эса кўплаб мухлислар томонидан клуб билан муносабатлардаги совуқлик аломати сифатида қабул қилинди.

TEAMtalk нашри маълумотларига қараганда, футболчининг манфаатларини ҳимоя қилаётган агентлар аллақачон унга янги жамоа вариантларини ўрганишга киришган. Хусусан, Англия Премьер-лигасининг етакчи клублари — "Манчестер Сити", "Ливерпуль" ва "Челси" Винисиус хизматларига қизиқиш билдиргани айтилмоқда.

Ўз навбатида, «Реал» раҳбарияти ҳам вазиятни диққат билан кузатмоқда. Манбаларга кўра, агар жорий мавсум якунига қадар Винисиус билан янги шартнома бўйича келишувга эришилмаса, мадридликлар уни ёзги трансфер ойнасида сотиб юбориш вариантини ҳам кўриб чиқишга тайёр.

Шу тариқа, бир вақтлар «Реал»нинг асосий юлдузларидан бири саналган Винисиус Жуниор учун яқин ойлар ҳал қилувчи даврга айланиши мумкин. Мухлислар эса унинг клубда қолиши ёки Англияга йўл олишини катта қизиқиш билан кутмоқда.