Африка Кубоги финали жанжали: Сенегал терма жамоасига оғир жазо яқин
Африка миллатлар кубоги финалида пенальти белгиланганидан кейин юзага келган катта жанжал Сенегал терма жамоаси учун жуда қимматга тушиши мумкин. Маълумотларга кўра, майдонни тарк этганлар орасида бош мураббий Пап Тьяв, дарвозабон Эдуар Менди, ҳужумчи Николас Жексон, шунингдек ғалаба гол муаллифи Папа Гуйе каби бир қатор футболчилар ва мураббийлар 4–6 ўйинлик дисквалификация хавфи остида турибди.
Ҳаммаси VAR қарори ортидан бошланди
Беллашувнинг асосий вақти ниҳоясига етиб бораётган паллада ҳакам VAR’ни кўриб чиқиб, пенальти белгилашга қарор қилди. Шу қарордан қаттиқ ғазабланган сенегалликлар норозилик сифатида майдонни тарк этишди. Вазият шунчалик кескинлашдики, Садио Мане ҳам жамоадошларини қайтариш учун аралашишга мажбур бўлгани айтилмоқда.
Агар терма жамоа ўша заҳоти майдонга қайтмаганида, Сенегал катта мусобақалардан, хусусан жаҳон чемпионати циклидан бутунлай четлатилиш хавфига ҳам тушиб қолиши мумкин эди. Энди эса бошқа хавф пайдо бўлди: Сенегал кейинги ўйинларда муҳим футболчиларисиз қолиши эҳтимоли кучаймоқда.
Фақат дисквалификация эмас: жарима ва “бўш трибуна” хавфи
Маълум қилинишича, Сенегал терма жамоаси мухлисларнинг хатти-ҳаракати сабабли ҳам жазодан қочолмаслиги мумкин. Гап 50–100 минг евро миқдорида жарима, шунингдек бўлажак уй учрашувларини томошабинларсиз ўтказиш эҳтимоли ҳақида кетмоқда. Бу эса нафақат молиявий, балки руҳий жиҳатдан ҳам жамоага қаттиқ зарба бўлиши турган гап.
Марокаш эса орқага чекинмаяпти
Финалдан кейин Марокаш томони ҳам кескин қадам ташлагани айтилмоқда. Мезбонлар ФИФА ва Африка футбол конфедерациясидан ўйиндан кейинги ҳолатларни қайта кўриб чиқишни, ҳатто эҳтимол финални қайта ўтказиш масаласини муҳокама қилишни талаб қилган. Улар Сенегалнинг майдонни тарк этиши ва ўйиндаги умумий шов-шув марокашлик футболчиларга руҳий таъсир ўтказганини таъкидлашмоқда.
Эндиликда энг асосий савол битта: бу финалдан кейин “жазо пакети” қай даражада қаттиқ бўлади? Агар 4–6 ўйинлик дисквалификациялар тасдиқланса, Сенегал катта ўйинлар остонасида энг керакли фигураларидан айрилиб қолиши мумкин. Бу эса чемпионликдан ҳам оғирроқ йўқотишга айланиб кетиши ҳеч гап эмас.