Холанд чемпионлик пойгаси ҳақида гапирди: "Фулҳэм"га қарши у тайёр...
АПЛда чемпионлик учун баҳс яна қизийди. «Манчестер Сити» ҳужумчиси Эрлинг Ҳоланд ҳам бу кураш ҳақида ўз фикрларини билдириб, жамоа учун энг муҳим жиҳат — ҳозирги лаҳзада тўғри ритмни ушлаб қолиш эканини таъкидлади.
Норвегиялик снайпернинг айтишича, Премьер-лигада чемпионлик масаласи кўп марта охирги турларгача чўзилганини ҳамма кўрган. Шу боис у ҳозир “ҳаммаси битди” ёки “энди кеч” деган кайфиятга тушишни нотўғри деб ҳисоблайди.
Ҳоланд бугунги кунда ўз шахсий ҳолатига ҳам тўхталиб ўтди. Унинг сўзларига кўра, у учун энг асосий вазифа — тикланиш, жамоавий режимга тўлиқ қайтиш ва кейинги беллашувга бор диққатни қаратиш.
“Ҳозир мен учун энг муҳими — тикланиш, жамоавий режимга қайтиш ва тўлиқ равишда «Фулҳэм»га қарши навбатдаги учрашувга эътибор қаратиш. Олдинда ҳали кўп ўйинлар бор”, — дея Холанднинг фикрларини ESPN нашри келтирди.
Маълумот ўрнида айтиш жоиз, айни пайтда «Манчестер Сити» 50 очко билан турнир жадвалида иккинчи ўринда бормоқда. «Шаҳарликлар» пешқадам «Арсенал»дан 6 очко ортда қолган. Демак, олдиндаги ҳар бир учрашув — нафақат уч очко, балки психологик устунлик учун ҳам кураш дегани.
Хулоса битта: Холанд ва «Сити» ҳали таслим бўлгани йўқ. Мавсум узун, ўйинлар кўп, вазият ҳар турда ўзгариши мумкин. Энди эса барча эътибор — «Фулҳэм»га қарши баҳсда.