Гаттузо қийин ғалабани баҳолаб финалга жиддий тайёргарлик чақирди

Италия миллий жамоаси бош мураббийи Женнаро Гаттузо ЖЧ-2026 саралаши плей-офф босқичида Шимолий Ирландияга қарши кечган баҳсдан кейин ўз фикрлари билан ўртоқлашди. 2:0 ҳисобида якунланган учрашув ташқи кўринишидан осон туюлиши мумкин, аммо мураббий бу ғалаба жуда оғир кечганини алоҳида таъкидлади.

Гаттузонинг айтишича, рақиб жамоа кутилгандан ҳам жиддий қаршилик кўрсатган. Улар тез ва тўғридан-тўғри, вертикал узатмалар орқали ҳужум уюштиришга уринган ва айрим ҳолатларда Италияни қийин аҳволга солиб қўйган. Мураббий ўз шогирдлари ўйин сифатини танқид қилиб, жамоа бундан ҳам яхшироқ ҳаракат қилишга қодир эканини қайд этди.

Хусусан, Мануэл Локателлининг майдонда орқа чизиққа яқин ҳаракат қилгани жамоанинг ҳужумдаги суръатига салбий таъсир кўрсатган. Гаттузо таъкидлашича, жамоа ўйинни режалаштирилган даражада ривожлантира олмаган, ҳаракатлар секин кечган ва рақиб босими остида қолган.

Бироқ танаффусдан кейин вазият бироз ўзгарди. Италияликлар тўпни тезроқ айлантира бошлади, комбинациялар жонланди ва бу ўз самарасини берди. «Энг муҳими — биз ғалаба қозондик, лекин буни оддий натижа деб қабул қилиш хато бўлади», — деди мураббий.

Гаттузо, шунингдек, Бергамодаги мухлисларга алоҳида миннатдорчилик билдирди. Унинг сўзларига кўра, жамоа ҳатто танаффусда ҳам қўллаб-қувватлов остида кийиниш хонасига қайтган. «Мен танқидни эмас, қўллаб-қувватлашни ҳис қилдим. Бу биз учун катта мотивация», — деди у.

Энди Италияни ҳал қилувчи синов кутмоқда. 31 март куни жамоа сафарда Босния ва Ҳерцеговинага қарши майдонга тушади. Ушбу баҳс ғолиби Жаҳон чемпионати йўлланмасига эга бўлади. Гаттузо жамоани бу муҳим ўйинга жиддий тайёргарлик кўришга чақирди — чунки олдиндаги финал ҳақиқий имтиҳон бўлиши кутилмоқда.